Иҫәп алыу 34 - Изге Яҙма

Ҡәнғән ере сиктәре

¹ Раббы Мусаға былай тине:

² – Исраилдарға шуны бойор: Ҡәнғән еренә ингәс, унда Мин һеҙгә бирәсәк биләмәләрҙең сиктәре түбәндәгесә булыр.

³ Көньяҡтағы сиктәрегеҙ Цин сүленән һәм Эдом сиктәре буйынса һуҙылыр. Ул сигегеҙ Тоҙло диңгеҙҙең көньяҡ осонан көнсығышта башланыр.

⁴ Унан көньяҡҡа Ғаҡраббим тарлауығына тартылыр һәм Цин аша үтер, унан көньяҡтан Ҡадеш-Барнеағҡа табан сығыр, шунан Хасар-Аддарға тартылыр һәм Ғасмон аша үтер.

⁵ Ғасмондан Мысыр сигендәге йылғаға табан боролор ҙа, Бөйөк диңгеҙ буйында тамамланыр.

⁶ Көнбайыш сиктәрегеҙ Бөйөк диңгеҙ буйлап үтер. Был – көнбайыш сиктәрегеҙ.

⁷ Бына һеҙҙең төньяҡ сигегеҙ. Уны Бөйөк диңгеҙҙән – Һор тауына,

⁸ Һорҙан Лево-Хамаҫҡа тиклем үткәрегеҙ. Артабан сик Седадҡа тартылыр;

⁹ унан Зифронға тиклем дауам итер ҙә, Хасар-Ғенанға етеп туҡтар. Был – һеҙҙең төньяҡ сиктәрегеҙ.

¹⁰ Көнсығыш сикте Хасар-Ғенандан Шефамға ҡарай үткәрегеҙ,

¹¹ Шефамдан сик Ғайндың көнсығышынан Ривлаға тартылыр, шунан көнсығыштан Киннереҫ күле ярҙарына терәлер.

¹² Сик артабан Иордан йылғаһы буйлап төшөр ҙә Тоҙло диңгеҙгә етеп туҡтар. Был һеҙҙең илегеҙ булыр. Уның сиктәре шулай.

¹³ Муса Исраил халҡына шуны бойорҙо: – Раббы туғыҙ ырыуға һәм Менашшеның ярты ырыуына бирергә ҡушҡан ерҙәр ошо, һеҙ уны йәрәбә буйынса бүлеп алырһығыҙ.

¹⁴ Ә Рәүвән һәм Ғад ырыуҙары ғаиләләре менән, Менашше ырыуының икенсе яртыһы һымаҡ уҡ,

¹⁵ биләмә ерҙәрен Йерихо ҡаршыһынан, Иордандың көнсығыш тарафында алды.

¹⁶ Раббы Мусаға былай тине:

¹⁷ – Бына ерҙе һеҙгә бүлеп бирәсәк кешеләрҙең исемдәре: Әлғазар ҡаһин һәм Нун улы Йушағ.

¹⁸ Ер бүлергә һәр ырыуҙан берәр башлыҡты алығыҙ.

¹⁹ Уларҙың исемдәре: Йәһүҙә ырыуынан Йефунне улы Калев;

²⁰ Шимғон ырыуынан – Ғаммиһуд улы Шемуил;

²¹ Бинйәмин ырыуынан – Кислон улы Әлидад;

²² Дан ырыуынан – ырыу башлығы Буккий Йогли улы;

²³ Йософтоң улы Менашше ырыуынан – ырыу башлығы Ханниил Эфод улы;

²⁴ Әфраим ырыуынан – ырыу башлығы Ҡемуил Шифтан улы;

²⁵ Зевулун ырыуынан – ырыу башлығы Әлисафан Парнах улы;

²⁶ Исасхар ырыуынан – ырыу башлығы Палтиил Ғаззан улы;

²⁷ Ашер ырыуынан – ырыу башлығы Ахиһуд Шеломи улы;

²⁸ Нафтали ырыуынан – ырыу башлығы Педаһил Ғаммиһуд улы.

²⁹ Ҡәнғән ерендә исраилдарға биләмәләр бүлергә Раббы ошо кешеләргә бойорҙо.