Иҫәп алыу 31 - Изге Яҙма

Мидйәндәрҙән үс алыу

¹ Раббы Мусаға былай тине:

² – Исраилдар өсөн Мидйән халҡынан үс ал. Һуңынан ата-бабаларың менән ҡауышасаҡһың.

³ Муса халыҡҡа былай тине: – Арағыҙҙан яугирҙәр ҡоралландырығыҙ, улар мидйәндәргә ҡаршы һуғышҡа барыр, Раббының ул халыҡҡа булған үсен ҡайтарыр.

⁴ Исраилдарҙың һәр ырыуынан берәр мең кешене һуғышҡа әҙерләгеҙ.

⁵ Исраилдың һәр ырыуынан берәр мең кеше һайлап алынды, ҡораллы ун ике мең кеше яуға әҙерләнде.

⁶ Һәр ырыуҙан берәр мең кешене Муса Әлғазар ҡаһиндың улы Пинхас менән һуғышҡа оҙатты. Пинхас Изге сатыр һауыттары менән хәүеф тураһында ҡысҡырта торған борғоларҙы алды.

⁷ Исраилдар, Раббы Мусаға бойорғанса, мидйәндәргә ҡаршы һуғышҡа китте һәм уларҙың бөтә ирҙәрен ҡырҙы.

⁸ Барса ирҙәре менән бергә мидйәндәрҙең биш батшаһын – Әүиҙе, Рәҡәмде, Сурҙы, Хурҙы һәм Рәғавты ла үлтерҙеләр, Беғор улы Билғамды ла ҡылыстан үткәрҙеләр.

⁹ Мидйәндәрҙең ҡатын-ҡыҙҙарын һәм балаларын әсирлеккә алдылар, бөтә мал-тыуарын, көтөүҙәрен, бөтә йорт-ҡаралтыларын яумал иттеләр,

¹⁰ йәшәгән урындарындағы барлыҡ ҡала-ауылдарын үртәнеләр,

¹¹ кешенән алып малғаса бөтә табышты –

¹² әсирҙәрҙе, яумалды – Моав тигеҙлегенә, Иордан буйында Йерихо ҡаршыһына ҡоролған тупламдарына, Муса менән Әлғазар ҡаһинға, Исраил йәмғиәтенә алып ҡайттылар.

¹³ Уларҙы ҡаршыларға тупламдан Муса менән Әлғазар ҡаһин һәм йәмғиәттең бөтә башлыҡтары сыҡты.

¹⁴ Муса һуғыштан ҡайтҡан хәрби етәкселәргә, мең һәм йөҙ баштарына бик ныҡ асыуланып:

¹⁵ – Ниңә ҡатын-ҡыҙҙарҙы тере ҡалдырҙығыҙ? – тине. –

¹⁶ Тап шул ҡатындар, Билғам ҡотортоуы буйынса, исраилдарҙы Пеғорҙағы ваҡиға арҡаһында Раббыға хыянат иттерҙе бит! Раббы йәмғиәте шулар арҡаһында үләт ҡазаһына тарыны!

¹⁷ Шуның өсөн бөтә ир балаларҙы, ир ҡуйынын күргән барлыҡ ҡатындарҙы үлтерегеҙ.

¹⁸ Ир ҡуйынын күреп өлгөрмәгән ҡыҙ балаларҙы үлтермәгеҙ, үҙегеҙгә ҡалдырығыҙ.

¹⁹ Тағы шул: ете көн тупламдан ситтә булығыҙ. Кеше үлтергән йәки мәйеткә ҡағылған һәр кем – үҙегеҙ ҙә, әсирҙәрегеҙ ҙә – өсөнсө көндө һәм дә етенсе көндө таҙарынһын.

²⁰ Барлыҡ кейем-һалымығыҙҙы, күндән, кәзә дебетенән булған, ағастан яһалған барлыҡ әйберҙәрегеҙҙе таҙартығыҙ.

²¹ Әлғазар ҡаһин һуғыштан ҡайтҡан яугирҙәргә былай тине: – Раббы Мусаға биргән ҡанундың ҡағиҙәһе шундай:

²² алтынды, көмөштө, баҡырҙы, тимерҙе, аҡ һәм ҡара ҡурғашты –

²³ утҡа түҙгән бөтөнөһөн – таҙарындырыу өсөн ут аша үткәрегеҙ, шунан таҙарыныу һыуы менән йыуығыҙ. Утҡа сыҙамағанды һыуҙа йыуығыҙ.

²⁴ Етенсе көндө кейем-һалымығыҙҙы йыуығыҙ, таҙа булырһығыҙ, шунан һуң тупламға ҡайтығыҙ.

Яумалды бүлеү

²⁵ Раббы Мусаға былай тине:

²⁶ – Әлғазар ҡаһин һәм халыҡтың нәҫел башлыҡтары менән бергәләп әсиргә алынған кешеләрҙе, табышҡа төшкән малды һана.

²⁷ Яумалды яуҙа ҡатнашҡандар менән бөтә йәмғиәткә таратыр өсөн, тигеҙ итеп икегә бүл.

²⁸ Һуғышта ҡатнашҡан яугирҙәрҙең өлөшөнән һәр биш йөҙөнсө әсирҙе, эре малды, ишәкте һәм ваҡ малды ал да Раббыға һалым итеп,

²⁹ Уға саҙаҡа рәүешендә Әлғазар ҡаһинға тапшыр.

³⁰ Исраил халҡы өлөшөнән һәр илленсе әсирҙе, эре малды, ишәкте һәм ваҡ малды Раббы сатырында яуаплы булған левиҙәргә бир.

³¹ Муса менән Әлғазар ҡаһин Раббы Мусаға ҡушҡанса эшләне.

³² Һуғышта булғандар алып ҡайтҡан табыш-яумал түбәндәгесә ине: ваҡ мал – алты йөҙ етмеш биш мең,

³³ эре мал – етмеш ике мең,

³⁴ ишәктәр – алтмыш бер мең,

³⁵ кешеләр: ир ҡуйыны күрмәгән ҡыҙҙар – утыҙ ике мең.

³⁶ Уларҙың яртыһы һуғышта ҡатнашҡандарҙың өлөшөнә төштө: ваҡ мал – өс йөҙ утыҙ ете мең биш йөҙ,

³⁷ уларҙан Раббыға ваҡ малдан һалым – алты йөҙ етмеш биш;

³⁸ эре мал – утыҙ алты мең, ошонан Раббыға – етмеш ике баш;

³⁹ ишәктәр – утыҙ мең биш йөҙ, ошонан Раббыға – алтмыш бер баш;

⁴⁰ кешеләр – ун алты мең, ошонан Раббыға – утыҙ ике йән.

⁴¹ Муса, үҙенә Раббы бойорғанса, был саҙаҡаны – Раббыға тигән һалымды – Әлғазар ҡаһинға тапшырҙы.

⁴² Һуғыштан алып ҡайтҡандан Муса исраилдарға тип айырып алған

⁴³ йәмғиәткә төшкән өлөш түбәндәгесә ине: ваҡ мал – өс йөҙ утыҙ ете мең биш йөҙ,

⁴⁴ эре мал – утыҙ алты мең,

⁴⁵ ишәктәр – утыҙ мең биш йөҙ,

⁴⁶ кешеләр – ун алты мең.

⁴⁷ Муса, Раббы бойорғанса, исраилдар өлөшөнән кеше һәм мал-тыуарҙың илленән берен алып, Раббы сатырында яуаплы булған левиҙәргә бирҙе.

⁴⁸ Мусаға ғәскәр башлыҡтары – мең һәм йөҙ баштары килде лә

⁴⁹ былай тине: – Беҙ хеҙмәтселәрең ҡул аҫтыбыҙға һин биргән яугирҙәрҙе иҫәпләп сыҡты, береһе лә юғалмаған.

⁵⁰ Бына, үҙебеҙҙе Раббы алдында пакландырыу өсөн, үҙебеҙ тапҡан алтын әйберҙәрҙе – ҡулбаш беләҙеге, беләҙектәр, балдаҡтар, алҡалар һәм мунсаҡтарҙы – бүләк итеп килтерҙек.

⁵¹ Муса менән Әлғазар ҡаһин уларҙан был алтын әйберҙәрҙе алды.

⁵² Мең һәм йөҙ баштарынан Раббыға иғәнә булараҡ килтерелгән алтын бөтәһе ун алты мең ете йөҙ илле шекел тартты.

⁵³ Һуғышта ҡулға төшөргән алтынды иһә яугирҙәр үҙҙәренә алғайны.

⁵⁴ Муса менән Әлғазар ҡаһин алтынды мең һәм йөҙ баштарынан ҡабул итеп алдылар ҙа исраилдар иҫтәлеге итеп Раббы хозурына, Осрашыу сатырына килтерҙеләр.