Иҫәп алыу 10 - Изге Яҙма

Көмөш борғолар

¹ Раббы Мусаға былай тине:

² – Үҙеңә көмөштән сүкеп ике борғо яһап ал, улар һиңә йәмғиәтте йыйып, тупламдан алып сығыр өсөн кәрәк булыр.

³ Ике борғо ла ҡысҡыртһа, бөтә йәмғиәт һинең эргәңә, Осрашыу сатыры ауыҙына йыйылыр.

⁴ Бер генә борғо ҡысҡыртһа, эргәңә башлыҡтар, Исраил нәҫелдәре етәкселәре йыйылыр.

⁵ Борғо ҡуҙғалырға ауаз һалһа, көнсығышта туплам булып урынлашҡан ырыуҙар юлға сығыр.

⁶ Борғонан ҡуҙғалыу ауазы икенсе тапҡыр яңғыраһа, көньяҡта туплам булып урынлашҡан ырыуҙар юлға сығыр. Борғо юлға ҡуҙғалыу тураһында хәбәр итә.

⁷ Йыйын йыйырға кәрәккәндә лә борғо ҡысҡыртығыҙ, әммә ул ауаз хәүефле булмаһын.

⁸ Борғоларҙы Һарун нәҫеленән булған ҡаһиндар ҡысҡыртһын: был һеҙҙең өсөн быуындан-быуынға мәңгелек ҡағиҙә булһын.

⁹ Дошман, ерегеҙгә килеп, һеҙгә һөжүм итһә, борғоларығыҙҙы хәүеф барлығын белгертеп ҡысҡыртығыҙ. Аллағыҙ Раббы һеҙҙе иҫенә төшөрөр, дошмандарығыҙҙан ҡотҡарыр.

¹⁰ Күңел асҡан көндәрегеҙҙә һәм байрамдарығыҙҙа, яңы ай тыуған көндәрҙә, тотош яндырыу һәм татыулыҡ ҡорбандары килтергәндә борғо ҡысҡыртығыҙ – был Аллағыҙға үҙегеҙҙе иҫкә төшөрөү булыр. Мин – Раббы, һеҙҙең Аллағыҙ.

Исраилдарҙың Синайҙан китеүе

¹¹ Икенсе йылдың икенсе айының егерменсе көнөндә болот Килешеү сатырынан өҫкә күтәрелде.

¹² Исраилдар Синай сүленән ҡуҙғалып китте һәм, бер урындан икенсе урынға күсә-күсә, юлдарын дауам итте. Болот Паран сүленә етеп туҡтаны.

¹³ Раббының Муса аша биргән бойороғо буйынса тәүге тапҡыр юлға сығыуҙары ине.

¹⁴ Иң тәүҙә үҙ байрағы аҫтында төркөм-төркөм булып Йәһүҙә ғәскәре ҡуҙғалды. Уның башында Ғамминадав улы Нахшон ине.

¹⁵ Исасхар ырыуының ғәскәре башында – Суғар улы Неҫанил,

¹⁶ Зевулун ырыуы ғәскәре башында Хелон улы Әлиав ине.

¹⁷ Изге сатыр йыйып алынды, уны йөрөтөүсе Гершон улдары менән Мерари улдары, сатырҙы күтәреп, юлға ҡуҙғалды.

¹⁸ Шунан үҙ байрағы аҫтында төркөм-төркөм булып Рәүвән ғәскәре ҡуҙғалды. Ғәскәр башында Шедеур улы Әлисур ине.

¹⁹ Шимғон ырыуы ғәскәре башында Суришаддай улы Шелумиил ине.

²⁰ Ғад ырыуы ғәскәре башында Деғуил улы Әлъясаф ине.

²¹ Шунан изге әйберҙәрҙе йөрөтөүсе Ҡыһаҫ улдары ҡуҙғалды. Улар яңы урынға килеп еткәндә, Изге сатыр ҡороп ҡуйылған булырға тейеш ине.

²² Артабан үҙ байрағы аҫтында төркөм-төркөм булып Әфраим ғәскәре ҡуҙғалды. Ғәскәрҙең башында Ғаммиһуд улы Әлишамағ ине.

²³ Менашше ырыуы ғәскәренең башында Педаһсур улы Гамлиил ине.

²⁴ Бинйәмин ырыуы ғәскәре башында Ғидғони улы Авидан ине.

²⁵ Иң һуңынан үҙ байрағы аҫтында төркөм-төркөм булып Дан ғәскәре юлға сыҡты. Уларҙың ғәскәре башында Ғаммишаддай улы Ахиғәзер тора ине.

²⁶ Ашер ырыуы ғәскәре башында – Ғохран улы Пағиил,

²⁷ Нафтали ырыуы ғәскәре башында Ғенан улы Ахирағ ине.

²⁸ Төркөмдәргә бүленгән исраилдарҙың юлға сығыу тәртибе ошолай ине.

²⁹ Муса Мидйәндән ҡайныһы Реғуилдың улы Ховавҡа: – Беҙ Раббы «һеҙгә бирәм» тип вәғәҙә иткән ергә китеп барабыҙ, – тине. – Әйҙә беҙҙең менән, беҙ һиңә ҡарата яҡшы булырбыҙ, сөнки Раббы исраилдарға күп яҡшылыҡтар вәғәҙә итте.

³⁰ Ләкин Ховав: – Мин үҙ еремә, халҡыма ҡайтам, – тип баш тартты.

³¹ Муса иһә былай тине: – Беҙҙе ҡалдырмаһаң ине, сөнки һин сүллектә ҡайҙа туҡтарға һәм туплам ҡорорға беләһең, беҙгә күҙ-ҡолаҡ булыр инең.

³² Әгәр беҙҙең менән барһаң, Раббы беҙгә ҡылған игелекте һинең менән уртаҡлашырбыҙ.

³³ Исраилдар Раббы тауынан ҡуҙғалып, өс көнлөк юлға сыҡты. Өс көнөндә лә Раббының Килешеү һандығы уларға туҡталыр урын күрһәтер өсөн алдарынан барҙы.

³⁴ Туҡталған урындарынан ҡуҙғалған ваҡытта Раббының болото көндөҙҙәрен уларҙың өҫтөндә булды.

³⁵ Һандыҡ юлға ҡуҙғалған һайын Муса былай тиер булды: – Эй Раббым, ҡалҡ! Дошмандарың тырым-тырағай таралһын, Һине күрә алмағандар алдыңдан ҡасып бөтһөн!

³⁶ Һандыҡ туҡталғанда иһә: – Эй Раббым, ҡайт! Исраилдың Меңдәрсә үә меңдәрсә Халҡы эргәһенә ҡайт! – тиер ине.