Һыҡтау 5 - Изге Яҙма

Бишенсе һыҡтау

¹ Онотма, йә Раббы, башыбыҙға төшкәндәрҙе! Ҡара, беҙ ниндәй хурлыҡҡа ҡалдыҡ:

² Биләмә ерҙәребеҙ яттар ҡулына күсте, Өйҙәребеҙгә сит-яттар хужа.

³ Атайһыҙ ҡалдыҡ, үкһеҙ етембеҙ; Әсәйҙәребеҙ – тол ҡатын хәҙер.

⁴ Һыуыбыҙҙы ла көмөш түләп эсәбеҙ, Утынды ла аҡсаға һатып алабыҙ.

⁵ Эҙебеҙгә баҫып баҫтырып киләләр беҙҙе, Тамам хәлдән тайҙыҡ, ял күргән юҡ.

⁶ Туйғансы ашарлыҡ икмәк һорап, Мысыр менән Ашшурға ҡулыбыҙҙы һонабыҙ.

⁷ Ата-бабаларыбыҙ гонаһ ҡылды, Әммә хәҙер улар юҡ инде; Ә ғәйептәренең язаһы беҙгә йөкмәлде.

⁸ Ҡолдар хәҙер беҙгә хаким булды, Улар ҡулынан ҡотҡарып алыусы юҡ.

⁹ Йәнебеҙҙе ҡыл өҫтөнә ҡуйып ризыҡ эҙләйбеҙ, Сөнки сүлдән ҡылыс янап тора.

¹⁰ Аслыҡ ғазабынан тән тиребеҙ Усаҡта янған һымаҡ ҡарайып көйҙө.

¹¹ Ҡатындарҙы – Сионда, Ҡыҙҙарҙы Йәһүҙә ҡалаларында мәсхәрәләйҙәр.

¹² Ҡулдарынан аҫып ҡуйылды башлыҡтарыбыҙ, Аҡһаҡалдарға ихтирам бөттө.

¹³ Йәштәр тирмән ташын әйләндерә, Үҫмерҙәр утын йөгө аҫтында иҙелә.

¹⁴ Аҡһаҡалдар ҡала ҡапҡаһы янында ултырмай, Егеттәребеҙ көйҙәр уйнамай хәҙер.

¹⁵ Йөрәгебеҙҙә шатлыҡ бөттө, Бейеүҙәребеҙ ҡайғыға әйләнде.

¹⁶ Башыбыҙҙан тажыбыҙ ҡоланы, Ҡайғы беҙгә! Гонаһ ҡылдыҡ.

¹⁷ Шуға йөрәгебеҙгә ҡан һауҙы, Күҙҙәребеҙ томаланды.

¹⁸ Бушап ҡалды Сион тауы, Унда хәҙер тик төлкөләр гиҙә.

¹⁹ Әммә Һинең хакимлығың мәңгелек, йә Раббы! Быуындар үтер, Һин һаман тәхетеңдә ултырырһың!

²⁰ Ниңә беҙҙе ташланың шулай оҙаҡҡа? Ни өсөн беҙҙе бөтөнләйгә оноттоң?

²¹ Йә Раббы, беҙҙе Үҙеңә ҡайтар, беҙ ҡайтырбыҙ, Ҡабаттан элекке көндәрҙе бир.

²² Беҙҙән бөтөнләйгә ваз кисеүеңме? Беҙгә булған асыуыңдың сиге юҡмы?