Ғәмәлдәр 14 - Изге Яҙма

Паулус менән Барнабас Иконион ҡалаһында

¹ Иконионда Паулус менән Барнабас, ғәҙәттәгесә, йәһүдтәр ғибәҙәтханаһына инде. Уларҙың тәьҫирле итеп һөйләүенән бик күп йәһүдтәр һәм башҡа халыҡ кешеләре Раббыға инанды.

² Ә иманға килмәгән йәһүдтәр, йәһүд булмағандарҙы иманлыларға ҡаршы ҡотортоп, уларға ҡарата дошманлыҡ уятты.

³ Паулус менән Барнабас бында байтаҡ ваҡыт булды. Раббы тураһында ҡыйыу рәүештә вәғәзләнеләр һәм Раббы, Үҙенең мәрхәмәте хаҡындағы хәбәрҙе раҫлап, уларҙың ҡулы менән хикмәтле билдәләр һәм мөғжизәләр ҡылды.

⁴ Ҡала халҡы икегә бүленде: бер өлөшө – йәһүдтәр, икенселәре илселәр яҡлы булды.

⁵ Ахырҙа йәһүд булмағандар һәм йәһүдтәр, үҙҙәренең башлыҡтары менән бергә илселәргә ташланып, уларҙы таш менән бәреп үлтерергә ниәтләне.

⁶ Был хаҡта белеп ҡалғандан һуң, илселәр Лукауния өлкәһенә ҡасып китте. Ундағы Лустра, Дербе ҡалаларында һәм шул тирәләге ерҙәрҙә

⁷ халыҡҡа Һөйөнөслө Хәбәрҙе һөйләүҙәрен дауам иттеләр.

Лустра ҡалаһында булған хәлдәр

⁸ Лустра ҡалаһында аяҡтары йөрөмәгән бер кеше бар ине. Ул, тыумыштан уҡ ғәрип булып, бер ҡасан да атлай алмаған ине.

⁹ Ул да Паулус һөйләгән һүҙҙәрҙе тыңлап ултырҙы. Паулус уға туп-тура ҡараны ла, ғәриптең шифа аласағына ышанысы барлығын күреп, көслө тауыш менән:

¹⁰ – Тор, аяғыңа баҫ, – тип әйтте. Теге һикереп торҙо ла атлап китте.

¹¹ Халыҡ иһә, Паулустың нимә эшләгәнен күреп, Лукауния ерлеге телендә: – Беҙҙең яныбыҙға кеше ҡиәфәтендә илаһтар төштө! – тип ҡысҡыра башланы.

¹² Барнабасты – Зевс тип, ә Паулусты, башлыса ул һөйләгәнгә күрә, Гермес тип атанылар.

¹³ Ҡала ситендә урынлашҡан Зевс ҡорамының ҡаһины иһә ҡапҡа алдына үгеҙҙәр һәм сәскә бәйләмдәре алып килде, халыҡ менән бергә ҡорбан килтерергә булды.

¹⁴ Илселәр Барнабас менән Паулус был хаҡта белеп ҡалғас, өҫтәрендәге кейемдәрен йыртҡысланы, халыҡ төркөмөнә ташланып:

¹⁵ – Һеҙ нимә эшләйһегеҙ? – тип ҡысҡырҙы. – Беҙ – һеҙҙең кеүек үк кешеләр! Һеҙгә Һөйөнөслө Хәбәр алып килдек һәм, ялған илаһтарҙан арынып, күкте, ерҙе, диңгеҙҙе, уларҙағы бөтә нәмәне бар ҡылған тере Аллаға килеүегеҙҙе теләйбеҙ.

¹⁶ Элек Ул бөтә халыҡтарға үҙҙәренең юлдарынан барырға ихтыяр бирә ине.

¹⁷ Әммә, яҡшылыҡтар ҡылып, Үҙен күрһәтеп торҙо: ваҡытында күктәрҙән ямғыр яуҙырып, мул уңыш биреп, һеҙҙе ризыҡ менән тәьмин итте, йөрәктәрегеҙҙе ҡыуаныс менән тултырҙы.

¹⁸ Ошо һүҙҙәр менән дә улар халыҡты үҙҙәренә ҡорбан килтермәҫкә көскә-көскә генә күндерә алды.

Сүриә Антиохияһына ҡайтыу

¹⁹ Шулай ҙа Антиохиянан һәм Икониондан килгән ҡайһы бер йәһүдтәр халыҡты үҙҙәренең яғына ауҙарҙы. Паулусты таш бәреп туҡманылар ҙа, үлде тип уйлап, ҡаланан тышҡа сығарып ташланылар.

²⁰ Әммә эргәһенә шәкерттәре йыйылып киткәс, Паулус тороп кире ҡалаға инде. Икенсе көндө ул Барнабас менән Дербе ҡалаһына юл тотто.

²¹ Был ҡалала Һөйөнөслө Хәбәрҙе вәғәзләп, шәкерттәр һанын байтаҡҡа арттырҙылар. Аҙаҡ Лустра, Иконион һәм Антиохия ҡалаларына ҡайтып,

²² унда шәкерттәрҙең рухын күтәрҙеләр, иманда ныҡ торорға өндәнеләр. – Алла Батшалығына инер өсөн күп михнәттәр аша үтергә тура киләсәк, – тине улар.

²³ Улар һәр берҙәмлеккә өлкәндәр тәғәйенләнеләр һәм, ураҙа тотоп доға ҡылғандан һуң, уларҙы үҙҙәре инанған Раббының ҡулына тапшырҙылар.

²⁴ Бынан аҙаҡ улар, Писидиә аша үтеп, Памфулияға килде.

²⁵ Пергела Алла һүҙен бәйән иткәс, Атталея ҡалаһына йүнәлделәр.

²⁶ Атталеянан һыу юлы менән Антиохияға киттеләр. Ошо ҡалала Паулус менән Барнабас, үҙҙәренә тәғәйенләнгән эште атҡарыу өсөн, Алланың мәрхәмәтенә тапшырылғайны.

²⁷ Улар, Антиохияға ҡайтып еткәс, имандаштар берҙәмлеген йыйып, Алланың үҙҙәре аша ниҙәр эшләгәнен, Уның йәһүд булмағандарға иман ишеген асҡанын – бөтәһен дә һөйләп бирҙеләр.

²⁸ Паулус менән Барнабас шәкерттәр янында байтаҡ ваҡытҡа туҡталды.