Әйүп 8 - Изге Яҙма

Билдадтың беренсе телмәре: Сикһеҙ ҡөҙрәт Эйәһе Раббыға ялбарһаң

¹ Шуахтан килгән Билдад былай тип яуапланы:

² «Тағы күпме шулай һөйләнерһең? Һүҙҙәрең – ярһыу ел һымаҡ!

³ Алла ғәҙелһеҙлек ҡыламы, Сикһеҙ ҡөҙрәт Эйәһе дөрөҫлөктө боҙамы?

⁴ Бәлки, балаларың Уға ҡаршы гонаһ иткән дә, Уларҙы үҙ енәйәттәренең ҡулына тапшырғандыр.

⁵ Әгәр Аллаға табан ихласлап боролһаң, Сикһеҙ ҡөҙрәт Эйәһе Раббыға ялбарһаң,

⁶ Әгәр пак, намыҫлы булһаң, Ул шунда уҡ һине хәстәрләй башлар, Лайыҡлы урыныңа кире ҡайтарыр.

⁷ Башланғысың бәләкәй булһа ла, Ахырың бөйөк буласаҡ.

⁸ Үткән быуындарҙан һораш, Ата-бабаларының тәжрибәләрен белеш.

⁹ Беҙ бит кисә тыуҙыҡ, бер нәмә белмәйбеҙ, Был донъяла ғүмеребеҙ – бары тик бер күләгәлер.

¹⁰ Һораһаң, улар өйрәтмәҫ-һөйләмәҫ, Күңелдәгеһен асмаҫ тиһеңме ни?

¹¹ Һыу булмаған урында ҡамыш үҫерме? Һаҙлыҡһыҙ ерҙә ҡалҡырмы күрән?

¹² Әлегә ул йәшел, ҡырҡылмаған булһа ла, Һыу ҡороһа, башҡа үләндәрҙән алда кибә.

¹³ Алланы онотҡан һәр кемдең ахыры шундай; Аллаһыҙ бәндәнең өмөтө шулай киҫелә.

¹⁴ Ышанысы – өҙөлөргә торған серек бер еп, Именлеге – үрмәксе ауы.

¹⁵ Үрмәксе ауына һөйәлер – ау өҙөлөр, Епкә йәбешер – уныһы ла сыҙамаҫ.

¹⁶ Аллаһыҙ ул – ҡояшта йәшелләнгән үлән; Үҫентеләре тотош баҡсаға йәйелер,

¹⁷ Тамырҙары таштар араһына үтеп инер, Таш диуарҙарға һарылыр.

¹⁸ Әммә төбө-тамыры менән йолҡоп алынһа, Үҫкән ере уны инҡар итер: „Һине күргәнем юҡ“, – тиер.

¹⁹ Бына шул тормошоноң бар ҡыуанысы! Урынына тупраҡтан башҡалар үҫеп сығыр.

²⁰ Бел: Алла камил бәндәне ситкә типмәҫ, Ә яуызлыҡ эшләгәндәргә ярҙам итмәҫ.

²¹ Ул әле йәнә иренеңә йылмайыу ҡундырыр, Ауыҙыңды һөйөнөс ауаздары менән тултырыр.

²² Дошмандарың мәсхәрәгә ҡалыр, Яуыздарҙың сатыры юҡҡа сығыр».