Әйүп 41 - Изге Яҙма

¹ Уны тотам тип өмөтләнмә лә: Бер күреүҙән ултыра төшөрһөң.

² Уны ҡуҙғатырға йөрәге еткән кеше юҡ. Шулай булғас кем Минең ҡаршымда тора алыр?

³ Кем Миңә берәй нәмә бирҙе лә Мин уға бурыслы булып ҡалдым? Күктәр аҫтындағы бар нәмә – Минеке.

⁴ Ливъяҫандың аяҡтары, көсө, Кәүҙәһенең мөһабәтлеге хаҡында Өндәшмәйенсә ҡала алмайым.

⁵ Кем уның тиреһен тунай ала? Ике ҡат көбөн кем тишә ала?

⁶ Кемдең ҡулынан килә ҡапҡалай ауыҙын асыу? Осло тештәренең теҙмәһе ҡот осҡос.

⁷ Арт һаны ҡат-ҡат ҡалҡандар менән ҡаплы. Улар мисәтләнгән кеүек бик ныҡ беркетелгән,

⁸ Бер-береһенә терәлеп теҙелгәндәр, Араларынан хатта һауа үтерлек түгел.

⁹ Шул тиклем тығыҙ торалар, Йәбешкәндәр, айырырмын тимә.

¹⁰ Бышҡырһа, йәшен йәшнәгән һымаҡ; Күҙҙәре – таң нурҙарына оҡшаш.

¹¹ Ауыҙынан ут-ялҡын бөркөлә, Көйҙөргөс осҡондар атыла.

¹² Морон тишектәренән төтөн бөркөлә, Әйтерһең, ҡамыш яҡҡан усаҡта ҡаҙан ҡайнай;

¹³ Һулышынан күмер дөрләп китә, Ауыҙынан ялҡын урғыла.

¹⁴ Муйынында ҡеүәт йәшәй, Уның алдында хатта дәһшәт тә бейеп тора.

¹⁵ Итләс тәне ҡойоп ҡуйған һымаҡ тығыҙ; Шул ҡәҙәрле ҡаты, һис ҡаҡшатам тимә.

¹⁶ Йөрәге таштай ҡаты, Ҡул тирмәненең аҫҡы ташылай.

¹⁷ Ливъяҫан ҡуҙғалғанда, бәһлеүәндәр ҙә ҡурҡа, Ул ташланғанда артҡа сигенә.

¹⁸ Уға ҡаршы ҡылыс күтәреү файҙаһыҙ, Һөңгө лә, уҡ та, һис бер ҡорал сыҙамаҫ.

¹⁹ Тимерҙе ул һалам һымаҡ күрер, Баҡыр уға сөрөк ағас кеүек.

²⁰ Атҡан уҡтан ҡасмаҫ, Ә һапҡы ташын кәбәк һымаҡ та күрмәҫ.

²¹ Суҡмарҙы һалам тип ҡабул итер, Һөңгөнөң һыҙғырып осоуынан көлөр.

²² Ҡорһаҡ аҫты сүлмәк ватыҡтары кеүек осло: Мәтене ашлыҡ һуҡҡыс һымаҡ аҡтарып бара.

²³ Даръяны ҡаҙан кеүек ҡайнатыр; Диңгеҙҙе ҡайнаған еҫле майҙай болғатыр.

²⁴ Йөҙгәндә артынан балҡып торған эҙ ҡалдырыр; Аҡ күбектәр сал сәстәй тойолор.

²⁵ Ер йөҙөндә ундай йән эйәһе юҡ башҡаса; Ҡурҡыуһыҙ яратылған бер мәхлүк.

²⁶ Бөтөн тәкәбберҙәргә ул өҫтән аҫҡа ҡарай; Бөтөн мәғрур януарҙарҙың хакимы ул».