Әйүп 4 - Изге Яҙма

Әлифаздың беренсе телмәре: Алла хозурында кеше хаҡ була аламы?

¹ Темандан килгән Әлифаз былай тип яуап ҡайтарҙы:

² «Берәү һиңә һүҙ әйтергә баҙнат итһә, Күңелеңә ауыр алмаҫһыңмы? Хәйер, нисек өндәшмәй ҡалаһың?

³ Хәтереңә төшөр, үҙең күптәргә өгөт-нәсихәт бирҙең, Ҡулы һәленеп төшкәнгә көс өҫтәй инең.

⁴ Йығылғанды һүҙең менән торғоҙҙоң, Ҡалтыранған тубыҡтарҙы нығындырҙың.

⁵ Инде үҙ башыңа төшкәс, сабырлығыңды юйғанһың; Үҙеңә килеп ҡағылғас, бөтөнләй ҡаушап ҡалғанһың.

⁶ Алланан ҡурҡыу ышаныс бирмәйме ни? Кәмселекһеҙ йәшәүеңә өмөт бағлай алмайһыңмы?

⁷ Хәтереңә төшөр: ғәйепһеҙҙең Ҡасан һәләк булғаны бар? Намыҫлыларҙың юҡҡа сыҡҡанын ҡайҙа күрҙең?

⁸ Минең күреүемсә, золом һөрөп, Яуызлыҡ сәскән бәндәләр ҡаза ура.

⁹ Улар Алланың һулышынан юҡ була, Нәфрәтенең еле уларҙы һепереп түгә.

¹⁰ Ажарланып ырылдаған арыҫлан да тыныр, Йәш арыҫландың теше ҡырылыр.

¹¹ Табыш булмағас, арыҫлан һәләк була, Инә арыҫландың балалары таралышып бөтә.

¹² Йәшерен һүҙ ишетелде миңә, Ҡолағыма бышылдау сағылды.

¹³ Тынғыһыҙ төнгө һаташыуҙар ҡосағында булғанда, Кеше тәрән йоҡоға талған заманда,

¹⁴ Дәһшәт солғап алды мине, ҡалтырандым, Ҡурҡыу елегемә тиклем үтеп инде.

¹⁵ Бер рухтың еле йөҙөмә тейеп үтте – Хатта тәндә ҡош йөндәрем ҡалҡты.

¹⁶ Ул туҡтаны, уның ни булғанын аңламаным, Тик рәүешен генә абайланым. Тынлыҡта тауыш ишеттем:

¹⁷ „Алла хозурында кеше хаҡ була аламы? Яратыусыһы алдында саф бер әҙәм бармы?

¹⁸ Ҡара, Алла хеҙмәтселәренә лә ышанып бөтмәй, Хатта фәрештәләрендә лә етешһеҙлек таба.

¹⁹ Балсыҡ өйҙәрҙә йәшәгән, Нигеҙе саң-туҙан булған, Һытып ташлауы көйәнән дә Анһатыраҡ булған әҙәмгә ышанһынмы?

²⁰ Ғүмерҙәре иртәнән кискә тиклем дә бармай, Абайламай ҙа ҡалаһың – юҡҡа сыға.

²¹ Тәндәренең бер һеңере тартып алынһа, Аҡыл-зирәклеккә ирешмәйенсә үлеп китәләр“.