Әйүп 37 - Изге Яҙма

¹ Быларҙан минең йөрәгем ҡалтырана, Күкрәгемдән сығырҙай булып тибә.

² Тыңлағыҙ, Алланың тауышын тыңлағыҙ, Ауыҙынан сыҡҡан күкрәүҙе ишетегеҙ!

³ Күк аҫтында һәр тарафҡа ауаз һала, Йәшендәре ерҙең сиктәрен яҡтырта.

⁴ Артынса тауышын күкрәтер, Мәғрур тауышы менән тетрәтер. Ауазы ишетелгәндә йәшен ялҡынын туҡтатмаҫ.

⁵ Хайран ҡалдырырлыҡ итеп күкрәй Алла, Беҙҙең һуш-аҡыл етмәҫлек эштәр ҡыла.

⁶ Ҡарға: „Ергә яу“, – тип әмер бирә. Ямғырға: „Көслөрәк ҡой“, – тип бойора.

⁷ Үҙе бар ҡылған кешеләр Уның эштәрен белһен тип, Барыһының ҡулын тыйып тора.

⁸ Ул саҡта хайуандар ышыҡҡа ҡаса, Өңдәренә инеп йәшеренә.

⁹ Дауыл үҙенең торлағынан сыға, Төньяҡтан иҫкән ел һалҡын килтерә.

¹⁰ Алланың һулышы һыуҙарҙы туңдыра, Иркен һыуҙарҙың өҫтө боҙ менән ҡаплана.

¹¹ Ул болоттарҙы һыу менән һуғара, Болот эсенән йәшен уттарын сәсә.

¹² Бөтә ер йөҙөндә нимә ҡушһа, шуны эшләр өсөн, Болоттар Уның ихтыяры менән әйләнеп йөрөй.

¹³ Йә кешеләрҙе язалар өсөн, Йәки тупрағын һуғарып, Рәхим-шәфҡәтен күрһәтергә ямғыр күндерә.

¹⁴ Туҡта, тыңла мине, Әйүп, Алланың ғәжәйеп ғәмәлдәре тураһында уйла.

¹⁵ Алла болоттарға йөҙөр өсөн нисек бойорғанын, Улар эсендә йәшендең нисек ялтлағанын беләһеңме?

¹⁶ Болоттарҙың ни рәүешле эленеп тороуын, Камил белемгә Эйә булғандың ғәжәйеп эштәрен аңлайһыңмы?

¹⁷ Көйҙөргөс көньяҡ еле аҫтында ер әлһерәп ятҡан саҡта Кейемеңдә һиңә эҫе –

¹⁸ Көҙгө кеүек ҡаты күк көмбәҙен Алла һымаҡ киреп ҡуя алырһыңмы?

¹⁹ Уға нимә тип әйтәйек, өйрәт беҙгә? Ҡараңғылығыбыҙ арҡаһында рәтләп һүҙ ҙә әйтә алмайбыҙ.

²⁰ Минең әйтергә теләгәнемде Уға берәйһе еткерерме? Кемдең әйтеп һәләкәткә тарығыһы килһен?

²¹ Ел болоттарҙы ҡыуып күкте таҙартҡас, Күктә балҡыған ҡояшҡа ҡарау мөмкин түгел.

²² Төньяҡтан алтын балҡыш килә, Алла дәһшәтле ғиззәт менән килә.

²³ Сикһеҙ ҡөҙрәт Эйәһе беҙҙең өсөн аҡыл етмәҫлек, Ҡеүәте һәм ғәҙеллеге менән бөйөк, Хаҡлыҡ Эйәһе һис кемде йәберләмәҫ.

²⁴ Шуға ла кешеләр Унан ҡурҡып тора, Ул үҙен аҡыллы һанағандарға боролоп та ҡарамаҫ».