Әйүп 3 - Изге Яҙма

Әйүптең беренсе телмәре: Ҡараңғылыҡҡа убылһын ул көн

¹ Шунан һуң Әйүп, һүҙ башлап, үҙе донъяға килгән көндө ҡәһәрләне.

² Ул былай тине:

³ «Мин тыуған көн, „Ир бала яралды!“ – тип әйткән төн юҡҡа сыҡһын!

⁴ Ҡараңғылыҡҡа убылһын ул көн, Алла күктә уны иҫенә алмаһын, Ул көн өсөн таң тыумаһын.

⁵ Дөм ҡараңғылыҡ, үлем шәүләһе йолоп алһын, Уны ҡара болот томалаһын, Ҡояш тотолоу дәһшәткә һалһын.

⁶ Ул төндө дөм ҡараңғылыҡ йотһон, Йыл көндәре араһында һаналмаһын, Айҙарҙың хисабына инмәһен.

⁷ Әйҙә ул төн ҡыҫыр ҡалһын, Унда шатлыҡ ауазы яңғырамаһын.

⁸ Ливъяҫанды уята алырлыҡ Көндәргә ләғнәт уҡыусылар Әйҙә ул көнгә ҡарғыш яуҙырһын.

⁹ Ул төндөң таң йондоҙҙары ҡараңғыланһын; Зарығып таңды көтөүе бушҡа сыҡһын; Иртәнге шәфәҡ нурҙарын күрә алмаһын.

¹⁰ Сөнки ул төн әсәйемдең аналығын бикләмәгән, Күҙҙәремде ғазаптарҙан йәшермәгән.

¹¹ Ни өсөн мин үле тыумағанмын? Ҡарындан сығыу менән йән бирмәгәнмен?

¹² Ниңә мине тыуғанда теҙҙәренә ҡабул иткәндәр? Ниңә миңә күкрәк һөтөн имеҙгәндәр?

¹³ Хәҙер тыныс ятҡан булыр инем, Үлем йоҡоһонда ял табыр инем

¹⁴ Һалдырған ҡалалары күптән үк емерелгән Ер батшалары, уларҙың вәзирҙәре,

¹⁵ Өйҙәрен көмөш менән тултырған, Алтынға хужа булған түрәләр араһында.

¹⁶ Нишләп яралғы саҡта уҡ төшмәгәнмен? Яҡты донъя күрмәгән сабыйҙай күмелмәгәнмен?

¹⁷ Унда залимдар яуызлығынан туҡтай, Унда талсыҡҡандар ял таба.

¹⁸ Унда тотҡондар ҙа тыныслыҡта, Күҙәтселәрҙең аҡырыныуын ишетмәй.

¹⁹ Унда олоһо ла, кесеһе лә – бергә; Ҡол да хужаһынан азат.

²⁰ Нимә өсөн ғазаплы бәндәгә яҡтылыҡ бирелгән? Йәне әсегәнгә нимәгә ул йәшәү?

²¹ Улар үлем көтә, тик таба алмай. Хазинанан да артығыраҡ күреп эҙләй.

²² Ҡәбер ситенә килеп баҫһалар, ҡыуанырҙар, Шатланып бөтә алмаҫтар ине.

²³ Ни өсөн ғүмер бирелә Ҡайҙа барғанын белмәгән, Алла һәр йәһәттән ҡамалап алған кешегә?

²⁴ Көрһөнөүем ризығымдан алда килә, Ыңғыраштарым һыуҙай эркелә.

²⁵ Ниҙән ҡурҡһам – алдыма шул килде, Нимәнән ҡотом осһа – башыма шул төштө.

²⁶ Ал да юҡ, ял да юҡ, йәм дә юҡ, Бары тик ғәм генә тороп ҡалды».