Әйүп 26 - Изге Яҙма

Әйүптең туғыҙынсы телмәре: Алланың сикһеҙ бөйөклөгө

¹ Әйүп былай тип яуап ҡайтарҙы:

² «Хәле ҡалмағанға нисек ярҙам иттең? Көсһөҙ ҡулға таяныс булдыңмы?

³ Аҡылы етмәгәнгә ниндәй шәп кәңәш бирҙең? Уға ниндәй мул-мул белем бирҙең?

⁴ Был һүҙҙәргә һине кем өйрәтте? Кемдең рухы һинең аша һөйләй?

⁵ Аҫта әруахтар тетрәнә, Һыуҙар һәм дә унда йәшәүселәр.

⁶ Алла хозурында үлеләр донъяһы шар асыҡ, Һәләкәт еренең ҡапҡасы юҡ.

⁷ Ул төньяҡты бушлыҡтың өҫтөнә киргән; Һис нимәһеҙ ерҙе аҫып ҡуйған.

⁸ Ул болоттарына һыу туплай, Һыуҙың ауырлығына болоттар йыртылмай.

⁹ Ул тәхетен йәшереп ҡуя, Үҙенең болото менән ҡаплай.

¹⁰ Һыуҙар өҫтөнә офоҡто һыҙып, Яҡтылыҡ менән ҡараңғылыҡты сикләй.

¹¹ Уның дәһшәтле ауазынан ҡурҡып Күктең таяуҙары дер ҡалтырай.

¹² Ҡеүәте менән диңгеҙҙе буйһондорҙо, Аҡылы менән Раһавты дөмбәҫләне.

¹³ Уның һулышынан күк йөҙө асылды; Ҡулы ҡасҡан йыланды сәнсеп үлтерҙе.

¹⁴ Былар – Уның ғәмәлдәренең тик аҙы ғына! Уның хаҡында ишеткәнебеҙ, гүйә, тик бышылдау. Ә Уның ҡөҙрәтле күкрәүен кем аңлай ала?»