Әйүп 23 - Изге Яҙма

Әйүптең һигеҙенсе телмәре: Мин Хөкөмдарым янында хаҡлыҡ ҡаҙаныр инем

¹ Әйүп былай тип яуап ҡайтарҙы:

² «Аһ-зарым бөгөн тағы ла әрнеүлерәк, Ыңғырашыуымды тыйырға тырышам.

³ Белһәм икән Уны ҡайҙан табырға, Төйәгенә бара белһәм икән!

⁴ Дәғүәмде алдына һалыр инем, Ауыҙ тултырып дәлилдәремде әйтер инем.

⁵ Нисек яуап ҡайтарғанын белер инем, Бөтә әйткәндәрен аңлар инем.

⁶ Ғиззәтле, ҡөҙрәтле була тороп, Минең менән хөкөмләшер инеме? – Юҡ, Ул миңә ҡолаҡ һалыр ине.

⁷ Шунда намыҫлы Уның менән бәхәсләшә алыр, Мин Хөкөмдарым янында хаҡлыҡ ҡаҙаныр инем.

⁸ Әммә көнсығышҡа барһам – Ул унда юҡ, Көнбайышҡа барһам да таба алмайым.

⁹ Ғәмәлдәре төньяҡ тарафтамы – күҙем күрмәй; Көньяҡҡа бороламы – абайламай ҡалам.

¹⁰ Әммә Ул минең тотҡан юлымды белә. Әйҙә, һынаһын – саф алтын һымаҡ буласаҡмын.

¹¹ Мин фәҡәт Уның аҙымдарынан барҙым, Уның юлын тоттом, ситкә атламаным.

¹² Ауыҙынан сыҡҡан бойороғонан тайпылманым, Әйткәндәрен көндәлек икмәгемдән артыҡ күреп ҡәҙерләнем.

¹³ Әммә Ул Үҙе хәл итә. Кем Уның фекерен үҙгәртә алыр? Ул нимә теләһә, шуны ҡыла.

¹⁴ Минең хаҡтағы ҡарарын бойомға ашырыр, Ундай ниәттәре Уның күптер.

¹⁵ Шуға күрә ҡаршыһында ҡурҡып торам, Уйлауым була, ҡалтырап төшәм.

¹⁶ Алла бар тәҡәтемде ҡоротто, Сикһеҙ ҡөҙрәт Эйәһе ҡотомдо алып бөттө.

¹⁷ Әммә йөҙөмдө ҡаплаған дөм ҡараңғылыҡ Минең ауыҙымды яба алмаҫ.