Әйүп 22 - Изге Яҙма

Әлифаздың өсөнсө телмәре: Асыҡҡанға икмәгеңде йәлләнең

¹ Темандан килгән Әлифаз былай тип яуап ҡайтарҙы:

² «Кешенән Аллаға ниндәй файҙа? Әҙәмдең иң аҡыллыһынан Уға бер фәтүә бармы?

³ Һинең тәҡүә булыуың сикһеҙ ҡөҙрәт Эйәһенә ҡыуанысмы? Ул һинең пак йәшәүеңдән нимә ота?

⁴ Ул һине Үҙенән ҡурҡҡан өсөн әрләй, Шуға күрә хөкөмгә илтә тиһеңме?

⁵ Яуызлығыңдың сиге юҡ, Енәйәттәрең һанһыҙ түгелме?

⁶ Ҡәрҙәштәреңдән сәбәпһеҙгә аманат алдың: Һуңғы кейемен систереп, яланғас ҡалдырҙың,

⁷ Арығанға эсергә һыу бирмәнең, Асыҡҡандан икмәгеңде йәлләнең.

⁸ Ергә ҡеүәтлеләр хужа була, Дәрәжәле генә унда төйәкләнә, тип уйланың.

⁹ Тол ҡатынды буш ҡул менән кире борҙоң, Етемдәрҙе һуңғы таяныстан яҙҙырҙың.

¹⁰ Шуға күрә әйләнәңдә – тоҙаҡ, Көтөлмәгән дәһшәт солғап алған.

¹¹ Шуға күҙеңде ҡараңғылыҡ томалай, Ташҡын һыуҙары башыңдан ашҡан.

¹² Күктәрҙән дә юғарыраҡ түгелме ни Алла? Күҙҙәреңде күтәреп баҡ, Йондоҙҙар ҡайһылай бейек!

¹³ Ә һин: „Алла нимә белә? – тиһең. – Ҡараңғылыҡ аша нисек хөкөм ҡылһын?

¹⁴ Ул күрмәй, ҡуйы болот ышыҡлай. Йөрөй тегендә-бында күк көмбәҙендә“.

¹⁵ Һин дә тотмаҡсыһыңмы залимдар һалған иҫке юлды?

¹⁶ Улар был донъянан ваҡытынан алда китте. Нигеҙҙәрен ташҡын йыуып алды.

¹⁷ Улар Аллаға: „Йыраҡ тор беҙҙән! – тип әйтә ине. – Сикһеҙ ҡөҙрәт Эйәһе нимә эшләтә алһын беҙҙе?“

¹⁸ Әммә өйҙәренә бәрәкәт биргән Ул ине. Шуға ла яуыздарҙың ниәте алыҫ торһон минән!

¹⁹ Тәҡүәләр яуыздарҙың һәләкәтен күреп шатланыр, Гонаһһыҙҙар уларҙан көлөр:

²⁰ „Бына дошмандарыбыҙ юҡ булды, Байлыҡтары янып, көлгә әйләнде!“

²¹ Алла менән татыулаш та тыныслыҡ тап, Шул сағында бәрәкәт тә килер.

²² Тыңла Уның ауыҙынан сыҡҡан өгөт-нәсихәтте, Әйткән һүҙҙәрен гел күңелеңдә йөрөт.

²³ Әгәр ҙә сикһеҙ ҡөҙрәт Эйәһенә табан йөҙ борһаң, Ҡабат аяҡҡа баҫырһың. Тик яманды сатырыңдан алыҫҡа ҡыу!

²⁴ Алтыныңды саң-туҙанға, Офир алтынын ҡырсынташ араһына ырғыт –

²⁵ Сикһеҙ ҡөҙрәт Эйәһе Үҙе һинең алтының, Өйөм-өйөм көмөшөң булыр.

²⁶ Шул саҡ сикһеҙ ҡөҙрәт Эйәһенән һөйөнөс алырһың, Күҙҙәреңде Аллаға төбәрһең.

²⁷ Уға доға ҡылырһың, ишетер, Әйткән нәҙерҙәреңде үтәрһең.

²⁸ Нимә ниәт ҡылһаң, шул ғәмәлгә ашыр, Юлдарыңа нур һирпелер.

²⁹ Түбәнһетелгән, йығылғанды күреп: „Торғоҙоғоҙ!“ – тип әйтерһең. Алла күңеле төшкәндәрҙе ҡотҡарыр.

³⁰ Хатта ғәйебе булһа ла йолоп алыр, Һинең ҡулыңдың паклығы арҡаһында гонаһлы ҡотҡарылыр».