Әйүп 18 - Изге Яҙма

Билдадтың икенсе телмәре: Аллаһыҙҙарҙың тәҡдире шундай

¹ Шуахтан килгән Билдад яуап ҡайтарҙы. Былай тине:

² «Ҡасан бөтөр һүҙҙән арҡан ишеүегеҙ? Башта уйлашығыҙ, унан һөйләшербеҙ.

³ Ниңә беҙ хайуан булып иҫәпләнәбеҙ? Күҙҙәреңә ахмаҡ булып күренәбеҙ?

⁴ Һин асыуҙан үҙ-үҙеңде өҙгөләйһең – Һин тип ер йөҙө бушап ҡалһынмы? Ҡаялар торған урынынан ҡупһынмы?

⁵ Эйе, яуыздарҙың уты һүнер; Усағының осҡоно ла ҡалмаҫ.

⁶ Сатырындағы нур ҡараңғылыҡҡа әйләнер, Янындағы шәме һүнер.

⁷ Ҡеүәтле аҙымдарының көсө бөтөр, Үҙ мәкере үҙенең башына етер.

⁸ Аяҡтары алып барып индерер тоҙаҡҡа, Үҙе барып баҫыр ҡапҡанға

⁹ Элмәк эләктерер бәкәленән, Тәпегә ул барып ҡыҫыласаҡ.

¹⁰ Йәшерен тоҙаҡ һағалар уны, Һуҡмағында ҡапҡан көтөп торор.

¹¹ Һәр тарафтан дәһшәт сорнап алыр, Артынан ҡалмай баҫтырыр.

¹² Аслыҡ тәҡәтен ҡоротор, Бәлә-ҡаза абынғанын көтөп торор.

¹³ Уның тиреһен сир-зәхмәт ашар, Әжәлдең тәүге сапҡыны ағзаларын мөнйөр.

¹⁴ Имен сатырынан һөйрәп сығарырҙар, Дәһшәт батшаһына килтерерҙәр.

¹⁵ Сатырында бер нәмәһе ҡалмаҫ, Торлағы көкөрт менән ҡапланыр.

¹⁶ Аҫтан тамырҙары ҡорор, Өҫтән ботаҡтары кибер.

¹⁷ Исеме донъяла онотолор, Урамдарҙа бер кем дә иҫенә алмаҫ.

¹⁸ Яҡтынан ҡараңғыға һөрөлөр, Донъя йөҙөнән ҡыуылыр.

¹⁹ Ни балаһы, ни нәҫеле ҡалмаҫ халҡы араһында, Йәшәгән ерҙәрендә бер кем дә тере ҡалмаҫ.

²⁰ Көнбайышта йәшәгәндәр, уның яҙмышын ишетеп, тетрәнер; Көнсығыштағылар, уны күреп, дәһшәткә батыр.

²¹ Яуыздарҙың торлағы менән шул булыр, Тәҡдире шундай аллаһыҙҙарҙың».