Әйтемдәре 8 - Изге Яҙма

Аҡыл кешеләргә өндәшә

¹ Аҡыл – зирәк ҡатын – саҡырамы әллә? Зиһен ауазын яңғырата түгелме?

² Юл буйындағы ҡалҡыуҙа, Юлдар сатында баҫып тора ул;

³ ҡала ҡапҡалары төбөндә һөрән һала, ишектәр алдында яр һала:

⁴ «Кешеләр, һеҙгә өндәшәм, әҙәм балаларына мөрәжәғәт итәм.

⁵ Бер ҡатлылар, аҡыл менән эш итергә өйрәнегеҙ, эй ахмаҡтар, аҡыл туплағыҙ.

⁶ Минең рухлы телмәремде тыңлағыҙ, – ауыҙымды дөрөҫлөк һөйләр өсөн асамын.

⁷ Минең телем хәҡиҡәтте һөйләй, ялған – ауыҙым өсөн ерәнгес.

⁸ Ауыҙымдан сыҡҡан һүҙҙәр гелән ғәҙел, мәкер-алдаҡ юҡ уларҙа.

⁹ Аңлағандар өсөн улар аңлайышлы, ғилем эйәләре өсөн дөрөҫ.

¹⁰ Нәсихәтемде көмөштән ғәйре күрегеҙ, ғилемде саф алтындан өҫтөн ҡуйығыҙ.

¹¹ Сөнки аҡыл аҫылташтан ҡиммәтерәк, һин теләгән бер нәмә лә уға тиңләшә алмаҫ.

¹² Мин аҡылмын, зирәклек минең юлдашым, белем менән төплөлөк – эҙләгәнем.

¹³ Раббынан ҡурҡыу – яуызлыҡты нәфрәт итеү ул; тәкәбберлек һәм әрһеҙлек, золом юлы, ялған һөйләү – мин күрә алмаған сифаттар.

¹⁴ Кәңәш миндә, айыҡ аҡыл миндә, мин зиһенмен, көс минең менән.

¹⁵ Минең ҡөҙрәтем менән батшалар идара итә, хакимдар ғәҙеллек урынлаштыра.

¹⁶ Минең ҡөҙрәтем менән башлыҡ һәм түрәләр, ер йөҙөнөң барлыҡ хөкөмдарҙары ғәҙел идара итә.

¹⁷ Мине һөйгәндәрҙе мин дә һөйәм, эҙләгәндәр мине тапмай ҡалмаҫ.

¹⁸ Минең менән байлыҡ һәм дан, бөтмәҫ муллыҡ һәм дөрөҫлөк.

¹⁹ Емештәрем алтындан, хатта саф алтындан яҡшыраҡтыр; файҙам иһә саф көмөштән өҫтөнөрәк.

²⁰ Мин тоғролоҡ юлынан, ғәҙеллек эҙҙәренән йөрөйөм,

²¹ үҙемде яратҡандарға байлыҡ килтерәм, хазиналарын арттырам.

²² Раббы Үҙ юлының башланғысында һәр эшенән әүәл миңә эйә булды.

²³ Донъя бар булғандан алда, әүәлдән үк барлыҡҡа килдем мин.

²⁴ Даръялар юҡ саҡта, сығанаҡтар ҙа булмағанда барлыҡҡа килдем.

²⁵ Тауҙар ҡалҡмағайны әле ул саҡта. Ҡалҡыулыҡтарҙан да алда тыуҙым.

²⁶ Раббы ҡырҙары менән ер өҫтөн, ғаләмдең бөртөк ҡомон да бар итмәгәйне.

²⁷ Ул күкте бар ҡылғанда – шунда булдым, даръя өҫтөнә офоҡто һыҙған саҡта,

²⁸ күк йөҙөнә болоттар урынлаштырғанда, ер аҫтындағы инеш юлдарын нығытҡанда,

²⁹ Ул һыу ташып сыҡмаһын тип, диңгеҙгә ярҙар ҡуйғанда, ергә нигеҙ һалған саҡта –

³⁰ мин Раббы янында оҫта булдым, һәр көн һайын Уның һөйөнөсө инем, гелән Уның алдында ҡыуандым.

³¹ Ерҙәге донъяға һөйөндөм мин, әҙәм заттарын уйлап ҡыуандым.

³² Ә хәҙер мине тыңлағыҙ, балалар: минең юлдан барыусылар бәхетле.

³³ Нәсихәтемде тыңлағыҙ – аҡыл туплағыҙ, уны һис тә кире ҡаҡмағыҙ.

³⁴ Мине тыңлап, көн һайын ҡапҡам төбәндә уяу торғандар, ишегемдән күҙен алмағандар бәхетле.

³⁵ Мине тапҡан кеше йәшәү таба, Раббының илтифатын ҡаҙана.

³⁶ Мине ысҡындырған үҙенә зыян ҡыла, мине күрә алмағандар үлемде үҙ итә».