Әйтемдәре 31 - Изге Яҙма

Лемуил батшаның һүҙҙәре

¹ Массалар батшаһы Лемуилдың әсәһенән өйрәнгән аҡыллы һүҙҙәре.

² Эй улым, һиңә нимә әйтәйем? Ҡарынымдың емеше булған улым, нимә һөйләйем? Эй нәҙерҙәремдең улы, һиңә нимә өйрәтәйем!

³ Ҡеүәтеңде ҡатындарға бирмә, батшаларҙы бөлгөнлөккә төшөрөүселәргә юлыңды бирмә.

⁴ Батшаларға, Лемуил, батшаларға түгел шарап эсеү, хакимдарға түгел хәмер эҙләп йөрөү;

⁵ юҡһа эсеп иҫереп, ҡанундарҙы оноторҙар, ярлыларҙы хаҡ хөкөмһөҙ ҡалдырырҙар.

⁶ Хәмерҙе һәләк булып барыусыға, шарапты ҡайғыға батҡанға бирегеҙ:

⁷ эсер ҙә ярлылығын онотор, күңел ғазаптарын иҫкә алмаҫ.

⁸ Теле зәғиф кеше өсөн, йәберләнгәндәр хоҡуғы өсөн;

⁹ ғәҙеллекте яҡлап, мохтаждарҙың, хәйерсенең хәле өсөн ауыҙ асып хәбәр һөйлә.

Яҡшы ҡатынға маҡтау (Алеф)

(Алеф)

¹⁰ Әҙәпле ҡатын табыуҙары ҡыйын, аҫылташтан ғәйре баһаһы.

(Бейт)

(Бейт)

¹¹ Ундай ҡатынға иренең йөрәге ныҡ ышана, уның менән һәр саҡ бәрәкәт ҡаҙаныр.

(Гимел)

(Гимел)

¹² Ул иренә яманлыҡ ҡылмаҫ, ғүмере буйы яҡшылыҡ эшләр.

(Далеҫ)

(Далеҫ)

¹³ Йөн тетһә лә, етен эшкәртһә лә – ҡулы тилбер, ҡулы белдекле.

(Һе)

(Һе)

¹⁴ Сауҙа караптары һымаҡ, алыҫтан икмәк табып килтерер.

(Уау)

(Уау)

¹⁵ Таң һарыһынан йоҡонан торор, ғаиләһенә ашарға хәстәрләр, хеҙмәтсе ҡыҙҙарына эш бүлеп бирер.

(Зайн)

(Зайн)

¹⁶ Баҫыу хаҡында ҡайғыртып, һатып алыр, тапҡан аҡсаһына йөҙөм баҡсаһы ултыртыр.

(Хеҫ)

(Хеҫ)

¹⁷ Билен ҡеүәт менән быуып, ҡулының көсөн арттырыр.

(Теҫ)

(Теҫ)

¹⁸ Эшенең файҙаһын күрә, төндәрендә лә шәме һүнмәй;

(Йод)

(Йод)

¹⁹ ҡулын иләүескә һуҙа, бармағынан орсоҡ төшмәй;

(Каф)

(Каф)

²⁰ ярлыларға игелек күрһәтер, мохтаждарға ярҙам ҡулы һуҙыр.

(Ламед)

(Ламед)

²¹ Ҡар яуһа ла хәүефләнмәҫ ҡатын, сөнки бөтә ғаиләһенең икешәр ҡат кейеме бар.

(Мем)

(Мем)

²² Үҙенә келәмдәр һуға, кейгәндәре – нәфис етен, ҡарағусҡыл ҡыҙыл йөндән.

(Нун)

(Нун)

²³ Ире ҡала ҡапҡаһы янында яҡшы таныш, илдең аҡһаҡалдары ҡоронда ултырыр.

(Самех)

(Самех)

²⁴ Ундай ҡатын етен кейем тегеп һата, сауҙагәрҙәргә ҡушаҡ һуғып бирә.

(Ғайн)

(Ғайн)

²⁵ Уның өҫ кейеме – ҡеүәт һәм абруй, Ул киләсәккә ҡарап ҡыуана.

(Пе)

(Пе)

²⁶ Ауыҙында уның – хикмәтле һүҙ, мәрхәмәт һәм нәсихәт булыр телендә.

(Саде)

(Саде)

²⁷ Өй эштәрен гел күҙәтеп тора, ялҡаулыҡтың ни икәнен белмәй.

(Ҡоф)

(Ҡоф)

²⁸ Балалары тороп уны данлай, ире маҡтап бөтә алмай:

(Реш)

(Реш)

²⁹ «Лайыҡлы ҡатындар күп булғандыр, тик һин уларҙың барыһынан арттырҙың!»

(Син менән Шин)

(Син менән Шин)

³⁰ Мөләйемлек – алдаҡсы, матурлыҡ – буш, ә Раббынан ҡурҡҡан ҡатын данға лайыҡ.

(Тау)

(Тау)

³¹ Хеҙмәтенә ҡарап хөрмәт күрһәтегеҙ уға, эштәрен ҡала ҡапҡаларында маҡтағыҙ!