Әйтемдәре 25 - Изге Яҙма

Сөләймәндең хикмәттәренең дауамы

¹ Былары ла Сөләймән батшаның хикмәттәре. Уларҙы Йәһүҙә батшаһы Хизкияһтың кешеләре йыйнап алып һаҡлаған.

² Алланың шөһрәте – эш-ғәмәлдәрҙе сер итеп тотоу, батшаларҙың даны – эштәрҙе тикшереп, асылын белеү.

³ Күктең бейеклеген, ер тәрәнлеген, батша күңелендәге уйҙарҙы белеп булмаҫ.

⁴ Көмөштән ҡатнашманы айыр, көмөшсө эшләйәсәк һауыт ҡалыр.

⁵ Яуызды батшанан айыр, ғәҙеллек менән тәхет нығыр.

⁶ Батша хозурында үҙеңде юғары ҡуйма, дәрәжәле түрә урынын алма;

⁷ «Түргәрәк күсеп ултыр», – тиеүҙәре түрә алдында түбәнгәрәк күсереүҙән яҡшыраҡ. Үҙ күҙең менән күргәнде,

⁸ хөкөмгә сығарырға ашыҡма; юғиһә аҙаҡтан, яҡының оятҡа ҡалдырғас, нишләрһең?

⁹ Яҡының менән дәғүәңде үҙ-ара хәл ит, башҡаның серен сисмә,

¹⁰ юҡһа, ишеткән береһе һине хур итер, яман атлы булып ҡалырһың.

¹¹ Урыны-еренә әйтелгән һүҙҙәр – көмөш һауыттағы алтын алма.

¹² Иғтибарлы ҡолаҡҡа аҡыллы кешенең шелтәһе алтын алҡа, саф алтын биҙәүес кеүек.

¹³ Ураҡ эҫеһендә ҡар һалҡыны нисек булһа, тоғро илсе лә үҙен ебәргән хужаһына хәл индерер.

¹⁴ Бүләк бирмәһә лә, бирҙем тип маҡтанған әҙәм ямғырһыҙ болот һәм ел кеүек.

¹⁵ Сабырлыҡ хакимды ла ышандыра, йомшаҡ тел һөйәкте лә һындыра.

¹⁶ Бал таптыңмы – туйғансы аша, ҡоҫҡансы ашама;

¹⁷ дуҫың өйөнә йыш йөрөмә, юҡһа, һинән туйыр ҙа, күрә алмай башлар.

¹⁸ Яҡынына ялған шаһитлыҡ ҡылған кеше Суҡмар, ҡылыс һәм үткер уҡ кеүек.

¹⁹ Афәт көнөндә ышанысһыҙ кешегә өмөтләнеү серек теш, сатан аяҡҡа өмөт бағлау һымаҡ.

²⁰ Ҡайғылы кеше алдында йыр йырлау һыуыҡ көндә кейемен систереү, яраға һеркә тамыҙыуға тиң.

²¹ Дошманың ас булһа, тамағын туйҙыр, һыуһаған булһа, һыуһынын ҡандыр.

²² Былай эшләп, уның башына ҡуҙ өйөрһөң, Раббы һиңә әжерен Үҙе бирер.

²³ Төньяҡ еле ямғыр алып килер, ғәйбәтсенең теле – сырайҙы боҙор.

²⁴ Холоҡһоҙ ҡатын менән бер өйҙә йәшәгәнсе, ҡыйыҡ башында йәшәү хәйерлерәк.

²⁵ Йыраҡ илдән килгән яҡшы хәбәр сарсаған кешегә һалҡын һыу һымаҡ.

²⁶ Залим алдында ебеп төшкән тәҡүә кеше бысраҡ шишмә, буръяҡ ҡоҙоҡ төҫлө.

²⁷ Балды күп ашау яҡшы булмаған һымаҡ, дан өҫтөнә дан ҡаҙанырға тырышыу ҙа һәйбәт түгел.

²⁸ Үҙенә баш була алмаған кеше диуарһыҙ ҡалған емерек ҡала ише.