Әйтемдәре 23 - Изге Яҙма

¹ Хаким менән табында ултырғанда, кем менән ултырғаныңды онотма.

² Ашау яғына үтә шәп булһаң, нәфсеңде тыя бел.

³ Уның һыйына ымһынып, онотолма, сөнки был – алдаҡсы ризыҡ.

⁴ Байыйым тип үтә бөтөрөнмә, зиһенең ундай уйҙарыңа сик ҡуя белһен.

⁵ Байлыҡ күҙ асып йомғансы юҡ була, ҡанатланып, бөркөт һымаҡ күккә осоп китер.

⁶ Һаран әҙәмдең ризығын ашама, уның тәмле-татлыһынан тыйыл,

⁷ сөнки эстән ул үҙ файҙаһын иҫәпләй, «Аша ла эс», – тиер һиңә, тик күңеле менән һинең янда булмаҫ.

⁸ Йотҡан киҫәгеңде кире сығарырһың, яғымлы һүҙҙәрең бушҡа булыр.

⁹ Ахмаҡҡа хәбәр һөйләмә – ул һинең аҡыллы һүҙҙәреңдән көлөр.

¹⁰ Күптән үк ҡуйылған ыҙан ташын күсермә, етемдәр өлөшөнә һин кермә,

¹¹ сөнки уларҙың Яҡлаусыһы ҡөҙрәтле, уларҙың һиңә ҡаршы дәғүәләрендә етемдәрҙең тарафын аласаҡ.

¹² Йөрәгеңде нәсихәткә йүнәлт, ҡолағыңды ғилем тыңларға өйрәт.

¹³ Балаңдың ғәйебен язаһыҙ ҡалдырма, сыбыҡтан кеше үлмәй.

¹⁴ Сыбыҡ менән арт һабағын уҡытһаң, йәнен һәләкәттән ҡотҡарырһың.

¹⁵ Улым, йөрәгеңдә аҡылың булһа, минең йөрәгем дә шатланыр.

¹⁶ Ауыҙыңда гел дөрөҫлөк булһа, бар булмышым ҡыуаныр.

¹⁷ Йөрәгең гонаһлыларҙан көнләшмәһен, һәр саҡ Раббынан ҡурҡыу йөрәгеңдә һаҡланһын.

¹⁸ Сөнки алда киләсәк бар, өмөтөң бушҡа сыҡмаҫ.

¹⁹ Тыңла, улым, аҡыллы бул, күңелеңде хаҡ юлға йүнәлдер,

²⁰ иҫергәнсе шарап эскән, һоғаланып ит ашаған бәндәләрҙең араһында булма.

²¹ Сөнки бирән менән эскесене хәйерселек баҫыр, йоҡосолоҡ иҫке-моҫҡоға кейендерер.

²² Яҡты донъяға килтергән атаң һүҙен тыңла, олоғайған көнөндә әсәйеңде хурлама.

²³ Хәҡиҡәт һатып ал, уны һатма, аҡыл, тәрбиә һәм ғилем йый.

²⁴ Тәүфиҡлы баланың атаһы ҡыуаныр, аҡыл эйәһенә ғүмер биреүсе шатланыр.

²⁵ Әйҙә ата-әсәң тантана итһен, ғүмер биргән әсәйең һөйөнһөн.

²⁶ Улым, йөрәгеңде миңә йүнәлт, минең юлдарыма күҙ һал.

²⁷ Уйнашсы ҡатын ул – төпһөҙ упҡын, кеше ҡатыны – тар ҡоҙоҡ.

²⁸ Ул юлбаҫар һымаҡ һине аңдый, ирҙәр араһында хыянатсылар һанын арттыра.

²⁹ Кемдә хәсрәт? Кемдә ҡайғы? Кемдә ыҙғыш? Кемдә зар? Сәбәпһеҙҙән кем туҡмалған? Кемдең күҙҙәре аларған?

³⁰ Шарап эсеүгә һалышҡандар, тағы ла эҙләп йөрөгәндәр икән был.

³¹ Шараптың ҡыҙыллығына, һауытта емелдәүенә, еңел генә эселеүенә ҡарама.

³² Аҙаҡтан ул йылан кеүек сағыр, ҡара йылан һымаҡ ағыу сәсер.

³³ Күҙҙәрең сәйер нәмәләр күрер, күңелеңә йүнһеҙ уйҙар килер.

³⁴ Үҙеңде диңгеҙ уртаһында ятҡандай, йөҙөп барған кәмәнең мачтаһында һымаҡ тойорһоң.

³⁵ «Туҡманылар мине, һиҙмәнем, таяҡланылар мине, тойманым, бына йоҡонан торам да, яңынан эсергә керешәм», – тиерһең.