Әйтемдәре 21 - Изге Яҙма

¹ Батшаның йөрәге, һыу ағымы һымаҡ, Раббы ҡулында: Ул уны ҡайҙа теләй, шунда бороп ебәрә.

² Кеше барған юлын дөрөҫ тип һанай, ләкин Раббы йөрәктәрҙе Үҙе үлсәй.

³ Тәҡүәлек менән ғәҙел ғәмәл ҡылыу Раббы алдында ҡорбан килтереүҙән өҫтөнөрәк.

⁴ Тәкәббер ҡараш, һауалы йөрәк – яуыздарҙың гонаһ юлындағы сырағы.

⁵ Тырыш кешене ниәттәре муллыҡҡа килтерер, ашыҡ-бошоҡ эшләүсе мохтажлыҡҡа дусар булыр.

⁶ Ялған юл менән табылған байлыҡ – таралып китер томан һәм үлем тоҙағы.

⁷ Залимдарҙың яуызлығы үҙ башына төшөр, сөнки улар ғәҙеллектән баш тартты.

⁸ Мут әҙәмдең юлы – кәкре, ихластың ғәмәле дөрөҫ булыр.

⁹ Холоҡһоҙ ҡатын менән бер өйҙә йәшәгәнсе, ҡыйыҡ башында йәшәү хәйерлерәк.

¹⁰ Яман әҙәм яуызлыҡҡа йән атыр, хатта яҡынын да аямаҫ.

¹¹ Мыҫҡыллаусыға яза биргәндә, бер ҡатлы аҡылланыр; аҡыллыға өгөт бирһәң, үҙенә белем алыр.

¹² Алла – ғәҙел, Ул яуыздарҙың йортон күҙәтеп тора, уларҙы бәләгә дусар итә.

¹³ Ярлының ялбарғанына ҡолаҡ һалмаған бәндә ярҙам һорап бер саҡ ялбарыр ҙа – яуап булмаҫ.

¹⁴ Йәшереп бирелгән бүләк – асыуҙы, ҡуйынға тығылған ришүәт ярһыуҙы баҫыр.

¹⁵ Хаҡ хөкөм яҡшы кешегә – шатлыҡ, яуызлыҡ ҡылыусыларға ҡурҡыу алып килә.

¹⁶ Аҡыл юлынан тайпылған әҙәм үлеләр донъяһында урын алыр.

¹⁷ Кәйеф-сафа һөйгән әҙәм муллыҡ белмәҫ, ашау-эсеү, шарап һөйгән – һис етешмәҫ.

¹⁸ Яуыз бәндә – тәҡүәнең, хыянатсы бәндә намыҫлының йоломолор.

¹⁹ Холоҡһоҙ, ғауғасыл ҡатын менән йәшәгәнсе, сүлдә йәшәүең хәйерле.

²⁰ Аҡыллының йортонда хазина һәм муллыҡ; ахмаҡ иһә нәмәһе бар, шуны ашай-туҙҙыра.

²¹ Тәҡүәлеккә, тоғролоҡҡа ынтылғандар имен тормош, ҡәҙер-хөрмәт ҡаҙаныр.

²² Аҡыллы ныҡ һаҡланған ҡаланы алыр, ҡаҡшамаҫлыҡ тип һаналған нығытманы ҡолатыр.

²³ Теленә ирек бирмәгән кеше үҙен бәләләрҙән һаҡлар.

²⁴ Тәкәббер, эре әҙәм – исеме уның «хаяһыҙ», үҙен башҡаларҙан үтә өҫтөн тотор.

²⁵ Ялҡауҙы ҡомһоҙлоҡ бөлдөрә, сөнки ҡулы эште һөйһөнмәй,

²⁶ ә теләге һаман көсәйә. Тәҡүә кеше иһә йәлләмәй өләшә.

²⁷ Яуыздар килтергән ҡорбан – ерәнгес, боҙоҡ ниәт менән килтерелһә, айырыуса.

²⁸ Ялған шаһит һәләк булыр, үҙе ишеткәнде һөйләүсенең һүҙе дөрөҫкә сығыр.

²⁹ Ямандың сырайы ҡырыҫ булыр, намыҫлы иһә үҙ юлын ныҡ тотор.

³⁰ Раббыға ҡаршы торор аҡыл да, зирәклек тә, кәңәш тә юҡ.

³¹ Яу көнөнә аттарҙы алдан әҙерләйҙәр, тик еңеүҙе бары Раббы ҡаҙандыра.