Әйтемдәре 19 - Изге Яҙма

¹ Ялған телле, өҫтәүенә ахмаҡ кешенән, намыҫлы йәшәгән ярлы күпкә яҡшыраҡ.

² Белемһеҙ тырышлыҡ яҡшы түгел, ашыҡҡан аяҡ абыныр.

³ Ахмаҡлыҡ кешене юлдан яҙҙыра, ғәйепте ул асыуланып Раббыға япһара.

⁴ Барлыҡ дуҫтарҙы арттыра, юҡлыҡ дуҫтарҙы айыра.

⁵ Ялған шаһит язаһыҙ ҡалмаҫ, алдаҡ һөйләгән ҡотола алмаҫ.

⁶ Түрә алдында күптәр ҡуштанлана, бүләк биреүсе әҙәм менән һәр кем дуҫ була.

⁷ Ярлыны хатта туғаны ла яратмаҫ, дуҫ тигәне лә унан ситләшер: һөйләшәм тип ашығып барһа – улар юҡ!

⁸ Аҡыл йыйған – үҙ йәнен дә һөйгән, аҡыл менән эш иткән – бәхет тапҡан.

⁹ Ялған шаһит язаһыҙ ҡалмаҫ, алдаҡ һөйләгән һәләк булыр.

¹⁰ Ахмаҡҡа муллыҡта йәшәү килешмәгән һымаҡ, ҡолға бейҙәр өҫтөнән хаким булыу килешмәҫ.

¹¹ Төплө кеше асыуҙан тыйылыр, ғәйепте кисерә белеү уға ҙурлыҡ бирер.

¹² Батшаның ярһыуы гүйә арыҫлан ырылдауы, ә илтифаты үләндәге ысыҡ һымаҡ.

¹³ Аҡылһыҙ улан – атаһына бәлә, мыжыҡ ҡатын – туҡтауһыҙ тамған һыу кеүек.

¹⁴ Йорт-мал – ата-әсәнән ҡалған мираҫ; аҡыллы ҡатын – Раббы бирмеше.

¹⁵ Ялҡау йоҡоға туймаҫ, эшлекһеҙҙең ашы булмаҫ.

¹⁶ Бойороҡто үтәгән ғүмерен һаҡлар, юлын ҡайғыртмаған үлемгә осрар.

¹⁷ Хәйерсегә игелек күрһәткән – Раббыға бурысҡа биргән, Раббы уға тулыһынса ҡайтарасаҡ.

¹⁸ Улыңды өмөт барҙа тәрбиәлә, ҡара уны, һәләкәтенә юл ҡуйма.

¹⁹ Ярһыу әҙәмгә ваҡытында язаһын бирергә тейешһең; бер аяһаң, тағы ла насарыраҡ булыр.

²⁰ Кәңәш тыңла, өгөт-нәсихәткә ҡолаҡ һал, ахыр килеп аҡыллыраҡ булырһың.

²¹ Кеше йөрәгендә ниәттәр күп, әммә Раббы ихтыяр иткәне генә бойомға аша.

²² Кешенең тоғролоғо – ҡиммәт, алдаҡсыға ҡарағанда ярлы яҡшыраҡ.

²³ Раббынан ҡурҡыу кешене йәшәүгә илтә; ундай кеше ҡәнәғәт йәшәр, тыныс йоҡлар, уға бер ниндәй ҙә насарлыҡ яҡынламаҫ.

²⁴ Ялҡау әҙәм табаҡҡа ҡулын тығыр, тик ауыҙына еткергәнсе йыбаныр.

²⁵ Хаяһыҙҙы шелтәләһәң, бер ҡатлылар һабаҡ алыр, аҡыллыны тәнҡитләһәң, өгөт-нәсихәтте алыр.

²⁶ Атаһын бөлдөргән, әсәһен өйҙән ҡыуған улан оят һәм хурлыҡ килтерә.

²⁷ Улым, өгөт-нәсихәтте тыңламаһаң, һабаҡ биргән һүҙҙәрҙән мәхрүм ҡалырһың.

²⁸ Мәкерле шаһит хаҡ хөкөмдө мыҫҡыл итә, яуыздың ауыҙы боҙоҡлоҡто йота.

²⁹ Хаяһыҙ әҙәм – хөкөмдән, ахмаҡтың арҡаһы ҡамсынан ҡотола алмаҫ.