Әйтемдәре 17 - Изге Яҙма

¹ Табыны мул булған ғауғалы йорттан, бер тешләм икмәк ҡатыһы булған тормош хәйерлерәк.

² Аҡыллы хеҙмәтсе хужаһының боҙоҡ улынан өҫтөн булыр; мираҫтан да хужаның улдары менән бер рәттән өлөш алыр.

³ Алтын-көмөш утта һынала, әҙәмдәрҙең күңелен Раббы һынай.

⁴ Яман әҙәм яуыздар һүҙенә ҡолаҡ һала, алдаҡсы әҙәм ғәйбәтселәргә эйәрә.

⁵ Ярлынан көлгән әҙәм Яратыусыһын да хурлай, кеше бәхетһеҙлегенә һөйөнгән – язаһын алмай ҡалмай.

⁶ Ейәндәр – өлкәндәрҙең тажы, балаларҙың даны – ата-әсәһе.

⁷ Ахмаҡҡа күтәренке телмәр оҡшамаған һымаҡ, затлы затҡа алдаҡ һүҙҙәр килешмәй.

⁸ Ришүәт – уны биргән кешегә тылсымлы таш һымаҡ тойола: гүйә, ҡайҙа боролһаң да, файҙа килтерә.

⁹ Кенә тотмаған – дуҫлыҡты һаҡлаған, үпкәһен онотмаған – дуҫын юғалтҡан.

¹⁰ Белеклегә шелтә лә һабаҡ, ахмаҡҡа йөҙ туҡмаҡтың да файҙаһы юҡ.

¹¹ Ғауғасыға янъял ғына булһын, шуға күрә уға илсенең иң аяуһыҙы күндерелер.

¹² Ҡоторонған ахмаҡҡа ҡарағанда, балаһын юғалтҡан инә айыуға осрауың хәйерлерәк.

¹³ Яҡшылыҡҡа яманлыҡ менән атҡандың йортонан бәлә китмәҫ.

¹⁴ Ыҙғыш башы быуа йырылыуға тиң, ҡыҙып китмәҫ элек туҡтай һал.

¹⁵ Яманды яҡлау, ғәйепһеҙгә ғәйеп ташлау – икеһе лә Раббы күҙендә әшәкелек.

¹⁶ Был нимә? Ахмаҡтың ҡулында аҡса бар ҙа, аҡыл һатып алырға башы юҡ.

¹⁷ Ысын дуҫтың дуҫлығы ғүмерлек; туған бәлә уртаҡлашыр өсөн тыуған.

¹⁸ Ярҙам ҡулы һуҙмаҡ булып, башҡа кеше өсөн яуаплылыҡты үҙ өҫтөңә алыу – алйотлоҡ.

¹⁹ Ыҙғыш яратҡан әҙәм – гонаһҡа ла әүәҫ; үҙ-үҙен юғары ҡуйып маҡтанған башына бәлә эҙләй.

²⁰ Боҙоҡ әҙәм яҡшылыҡ белмәҫ, мәкерле тел бәләгә дусар булыр.

²¹ Ахмаҡ баланың ата-әсәһе башына ҡайғы алыр; алйот улдың атаһынан һөйөнөс ҡасыр.

²² Шат күңел – иң шәп дауа, төшөнкө күңел һөйәктәрҙе ҡорота.

²³ Хаҡ хөкөмдө боҙор өсөн яуыз кеше йәшереп кенә ришүәт ала.

²⁴ Зирәктең күҙе аҡылға төбәлгән, ахмаҡтың күҙе ерҙең һәр тарафына йүнәлгән.

²⁵ Ахмаҡ улан – атаға көйөнөс, уны тапҡан әсәгә – әрнеү.

²⁶ Ғәйепһеҙ кешегә яза биреү, хөрмәтлене тура һүҙе өсөн туҡмау – яман эш.

²⁷ Зиһенле һүҙен үлсәп әйтер, белекле бушҡа ҡыҙып бармаҫ.

²⁸ Өндәшмәгән саҡта алйот та аҡыллы тойолор, ауыҙын йомоп ултырһа, белдекле күренер.