Әйтемдәре 15 - Изге Яҙма

¹ Йомшаҡ яуап асыуҙы баҫыр, ҡаты һүҙ һарыуҙы ҡайнатыр.

² Аҡыллының теле ғилемде күркәм итә, аҡылһыҙҙың теле ахмаҡлыҡ сәсә.

³ Раббы күҙе һәр тарафҡа барып етә: ул яҡшыһын да, яманын да күреп тора.

⁴ Шифалы һүҙ – тормош ағасы, хәйләле һүҙ – рухты емерә.

⁵ Алйот атаһының өгөт-нәсихәтен эшкә һанамаҫ; өгөттө ҡолағына киртеп ҡуйған иһә аҡыллы.

⁶ Тәҡүәнең өйө тулы хазиналыр, ямандың мал-мөлкәте бәлә килтерер.

⁷ Аҡыллының теле ғилем тарата, ахмаҡтың күңелендә ғилемгә урын юҡ.

⁸ Иманһыҙ килтергән ҡорбан – Раббы өсөн ҡәбәхәтлек, иманлының доғаһы – Уға ҡыуаныс.

⁹ Иманһыҙҙың юлы – Раббыға ҡәбәхәт, Ул хаҡлыҡ юлынан йөрөгәнде ярата.

¹⁰ Тоғро юлды ташлағанды ҡаты яза көтөр, шелтә һүҙгә нәфрәтләнгән – һәләк булыр.

¹¹ Үлеләр донъяһы һәм Һәләкәт урыны асыҡ булған Раббыға кешенең йөрәгендә ниндәй сер булһын!

¹² Йүнһеҙ әҙәм үҙен фашлағанды яратмаҫ, ул аҡыл эйәһе янына яҡын юламаҫ.

¹³ Күңеле көрҙөң йөҙө лә нурлы, ә ҡайғы-хәсрәт рухты төшөрә.

¹⁴ Зирәк йөрәк ғилем эҙләр, ахмаҡ тилелеге менән туйыныр.

¹⁵ Ярлының һәр көнө ҡайғылы, бәхетленең йөрәгендә – көн дә байрам.

¹⁶ Байлыҡ йыйып, хафаланып йәшәгәнсе, әҙгә хушһынып, Раббыны ҙурлау хәйерлерәк.

¹⁷ Һөйөү тулы урында тик йәшелсә генә ашау нәфрәт тулы урында һимеҙ тана ите ашауҙан яҡшыраҡ.

¹⁸ Яндырай ғауға сығара, сабыр кеше ыҙғышты туҡтата.

¹⁹ Ялҡауҙың юлын сәнскәк баҫыр, намыҫлыларҙың юлы тигеҙ-киң.

²⁰ Аҡыллы ул – атаға һөйөнөс, ахмаҡ ул – әсәһен хурлар.

²¹ Ахмаҡ тилеләнә лә шатлана, аҡыллы тура юлдан бара.

²² Кәңәшһеҙ эш тарҡалыр, кәңәшселәр күп булһа, уңыш ҡаҙаныр.

²³ Кеше дөрөҫ яуап бирһә – шатлыҡ; һүҙҙең урынлы әйтелгәне яҡшы!

²⁴ Аҡыллы кеше түбәндән, үлеләр донъяһынан тайпылыр өсөн юғары, йәшәүгә илткән юлдан йөрөй.

²⁵ Раббы тәкәбберҙең йортон емерер, тол ҡатындың биләмәһен һаҡлар.

²⁶ Ямандарҙың ниәте Раббыға ерәнгес, яғымлы һүҙҙәр иһә Уның өсөн пак.

²⁷ Ҡомһоҙ бәндә йортона бәлә тартыр, ришүәткә юл ҡуймаған кеше – имен йәшәр.

²⁸ Тоғро йөрәк уйлап яуап бирер, яуыздың теленән ағыу тамыр.

²⁹ Раббы ямандарҙан алыҫ тора, иманлының доғаһына ҡолаҡ һала.

³⁰ Нурлы ҡараш күңелде ҡыуандыра, яҡшы хәбәр йәнгә-тәнгә аҙыҡ бирә.

³¹ Тормош һабағына иғтибарлы ҡолаҡ аҡыллылар араһында йәшәр.

³² Нәсихәтте кире ҡаҡҡан – зыян күрә, өгөттәргә ҡолаҡ һалған – аҡыл йыя.

³³ Раббынан ҡурҡыу аҡылға өйрәтә, күндәмлек данға юл аса.