Әйтемдәре 10 - Изге Яҙма

Мәҡәлдәр

¹ Сөләймән батшаның хикмәтле һүҙҙәре. Аҡыллы улан – ата һөйөнөсө, ахмаҡ улан – әсә көйөнөсө.

² Нахаҡ юл менән табылған байлыҡтан файҙа булмаҫ, ә хаҡлыҡ үлемдән ҡотҡарыр.

³ Раббы тоғро кешене ас ҡалдырмаҫ, ямандың ҡомһоҙлоғон кире ҡағыр.

⁴ Ялҡау ҡулдар бөлгөнгә төшөрөр, тырыш ҡулдар байлыҡ килтерер.

⁵ Аҡыллы ул йәй көнө иген игер, ураҡ ваҡытында йоҡлап ятҡан ул хурлыҡ килтерер.

⁶ Иманлының башында – фатиха, яуыздың телендә – золом.

⁷ Иманлының иҫтәлеге мөбәрәк булыр, яуыздың исеме тиҙ онотолор.

⁸ Аҡыллы кеше өгөттө ҡабул итер, ахмаҡты теле бәләгә илтер.

⁹ Тура юлдан йөрөгән имен йәшәр, кәкре юлдан киткән фаш ителер.

¹⁰ Мәкерле күҙ ҡыҫҡан хәсрәт килтерер, ахмаҡты теле бәләгә илтер.

¹¹ Иманлының теле – тормош шишмәһе, ямандың ауыҙында золом йәшенеп ятыр.

¹² Нәфрәт талаш ҡуптарыр, әммә мөхәббәт бөтә гонаһтарҙы ҡаплар.

¹³ Зирәктең ауыҙынан хикмәт сығыр, аҡылһыҙҙың арҡаһына һуйыл төшөр.

¹⁴ Аҡыллылар белем туплар, ахмаҡтың теле һәләкәтте яҡынайтыр.

¹⁵ Байға байлығы – ныҡлы ҡәлғә, ярлыға фәҡирлеге – оло бәлә.

¹⁶ Тәҡүәнең хеҙмәт емеше тормошҡа илтә, яуыздың табышы – яза.

¹⁷ Нәсихәтте үҙ итеү – тормошҡа юл, шелтәне үҙһенмәгән – юлдан аҙашыр.

¹⁸ Нәфрәтен йәшергән – ялған һөйләр, ғәйбәт таратыу – ахмаҡлыҡҡа бәрәбәр.

¹⁹ Күп һөйләгән гонаһтан ҡотола алмаҫ, телен тыйған аҡыллы булыр.

²⁰ Тәҡүәнең теле – саф көмөш, яуыздың йөрәге буп-буш.

²¹ Иманлының һүҙе күптәрҙе туҡландыра, ахмаҡты үҙ алйотлоғо һәләк итә.

²² Раббы фатихаһы кешене байыта, һин уның менән ҡайғы белмәҫһең.

²³ Ахмаҡ боҙоҡлоҡтан ләззәт таба, зирәкте – аҡыл шатландыра.

²⁴ Ямандың ҡурҡыуы ғәмәлгә аша, тәҡүә кеше моратына ирешә.

²⁵ Ҡупҡан ҡойон яманды һепереп түгер, тәҡүә кешенең нигеҙе мәңге торор.

²⁶ Тешкә – һеркә, күҙгә төтөн нисек булһа, йомошо төшкән кешегә ялҡау әҙәм дә шулай.

²⁷ Раббынан ҡурҡҡан – ғүмерен оҙайтыр, ямандарҙың йылдары иһә ҡыҫҡара барыр.

²⁸ Тәҡүәнең өмөтө шатлыҡҡа илтә, яуыздың көткәне бушҡа сыға.

²⁹ Камил кешегә Раббының юлы – һыйыныр урын, яуызлыҡ ҡылыусылар өсөн – һәләкәт.

³⁰ Тәҡүә мәңге тотороҡло булыр, яуыз иһә ерҙә ҡалмаҫ.

³¹ Тәҡүә ауыҙынан хикмәт яуыр, мәкерле тел ҡырҡып ташланыр.

³² Тәҡүәнең теле ләззәт килтерер, яуыздың ауыҙынан яманлыҡ сығыр.