Башланмыш 37 - Изге Яҙма

Йософтоң төштәре

¹ Яҡуп атаһы килмешәк булып йәшәгән Ҡәнғән ерендә төйәкләнде.

² Бына Яҡуп ғаиләһенең тарихы. Йософҡа ун ете йәш ине. Ул үҙенең ағалары – атаһының ҡатындары Билһа һәм Зилпанан тыуған ағалары менән көтөү көттө, уларҙы аталарына гел ошаҡлап торҙо.

³ Олоғайып барған сағында тыуған бала булғанға, Исраил Йософто башҡа улдарына ҡарағанда нығыраҡ ярата ине. Ул Йософҡа затлы күлдәк тектерҙе.

⁴ Аталарының Йософто үҙҙәренә ҡарағанда нығыраҡ яратыуын күреп, ағалары ҡустыларын шул тиклем һөйһөнмәне, хатта уның менән йүнләп һөйләшә лә алманы.

⁵ Бер ваҡыт Йософ төш күрҙе. Уны ағаларына һөйләгәс, улар уны тағы ла нығыраҡ күрә алмай башланы.

⁶ – Тыңлағыҙ әле, – тине Йософ уларға, – бына мин ниндәй төш күрҙем!

⁷ Имеш, беҙ баҫыуҙа көлтә бәйләйбеҙ, шунда мин бәйләгән көлтә турайып баҫты, ә һеҙҙең көлтәләр, уны уратып алып, минең көлтәгә баш эйҙе!

⁸ – Һин беҙҙең өҫтән батша булырға, хакимлыҡ итергә уйлайһыңмы ни әле? – тине уға ағалары. Күргән төшө өсөн дә, уны һөйләгәне өсөн дә уны тағы ла нығыраҡ яратмай башланылар.

⁹ Ә Йософ тағы бер төш күрҙе, уны ла ағаларына һөйләне. – Мин йәнә бер төш күрҙем: имеш, ай менән ҡояш та, улар янындағы ун бер йондоҙ ҙа миңә баш эйҙе, – тине ул.

¹⁰ Был төшөн атаһы менән ағайҙарына һөйләгәс, атаһы Йософто әрләп ташланы: – Ниндәй төштәр күрәһең һин? Нимә, беҙ барыбыҙ ҙа – мин, әсәйең, ағайҙарың – килеп һинең аяғыңа йығылырға тейеш булабыҙмы ни?

¹¹ Ағалары Йософтан көнләште, әммә атаһы был төштө хәтеренә һалып ҡуйҙы.

Ағаларының Йософто һатып ебәреүе

¹² Бер ваҡыт Йософтоң ағалары аталарының һарыҡтарын көтөргә Шәхәмгә китте.

¹³ Исраил Йософҡа былай тине: – Ағайҙарың Шәхәм эргәһендә мал көтә. Улар янына барып кил әле. – Ярай, – тип яуапланы Йософ.

¹⁴ – Бар ҙа ҡара, иҫән-амандармы, малдар ни хәлдә? Шунан миңә хәбәр алып ҡайт, – тине атаһы. Ул Йософто Хеврон үҙәненән юлға оҙатты. Йософ Шәхәмгә килде.

¹⁵ Ҡырҙа йөрөп ятҡан сағында уға бер кеше осрап: – Бында нимә эҙләп йөрөйһөң? – тип һораны.

¹⁶ – Ағайҙарымды эҙләйем, – тип яуапланы Йософ. – Әйт әле, зинһар, улар ҡайһы тирәлә көтөү көтә икән?

¹⁷ – Улар бынан китте, – тине теге кеше. – Мин уларҙың, Доҫанға барайыҡ, тип һөйләшкәндәрен ишетеп ҡалғайным. Йософ ары барып, уларҙы Доҫанда эҙләп тапты.

¹⁸ Ағалары Йософтоң яҡынлашып килеүен алыҫтан уҡ күрҙе һәм уны үлтерергә һүҙ ҡуйышты.

¹⁹ – Ана, беҙҙең төш күреүсе килә! – тиештеләр.

²⁰ – Үлтереп һыу соҡорона ырғытайыҡ та, ҡырағай януар ашаған, тип әйтер ҙә ҡуйырбыҙ. Бына шунан ҡарарбыҙ, уның төштәре нисек юш килер икән!

²¹ Рәүвән быны ишетте лә Йософто ҡотҡарырға теләне. – Үлтермәйек уны, – тине Рәүвән. –

²² Ниңә ҡан ҡойорға? Сүлдәге һыу соҡорона ташлағыҙ ҙа ҡуйығыҙ, тик үҙенә ҡағылмағыҙ. Ысынында иһә ул Йософто ҡотҡарып, атаһына кире ҡайтарырға уйлағайны.

²³ Йософ ағалары янына килеп етеү менән, улар уның затлы күлдәген систереп алдылар ҙа

²⁴ үҙен тотоп алып соҡорға ырғыттылар. Соҡор һыуһыҙ, буш ине.

²⁵ Ашарға ғына ултырғайнылар, Ғилғәд яғынан Исмәғил ырыуының сауҙагәрҙәр каруаны килгәне күренде – уларҙың дөйәләре Мысырға хуш еҫле ыҫмала, еҫле май, бәлзәм алып китеп бара ине.

²⁶ Йәһүҙә туғандарына: – Ҡустыбыҙҙы үлтереп, уның ҡанын йәшереүҙән беҙгә ни файҙа?

²⁷ Исмәғил кешеләренә һатайыҡ та ебәрәйек, ҡулыбыҙ ҙа таҙа булыр. Ул барыбер беҙҙең ҡәрҙәшебеҙ, бер ҡан бит, – тине. Ағай-эне бының менән килеште.

²⁸ Мидйән сауҙагәрҙәре яҡыныраҡ килгәс, Йософто һыу соҡоронан сығарҙылар ҙа егерме шекел көмөшкә исмәғилдәргә һатып ебәрҙеләр. Улар иһә Йософто Мысырға алып китте.

²⁹ Рәүвән боролоп соҡор янына килде, үрелеп ҡараһа – Йософ юҡ! Ҡайғыһынан ул кейемдәрен йыртҡысланы.

³⁰ – Малай юҡ та баһа! – тине Рәүвән, ҡустылары янына килеп. – Миңә ни эшләргә инде? Ҡайҙа барырға миңә хәҙер?

³¹ Туғандар Йософтоң күлдәген алдылар ҙа, бер кәзәне һуйып, күлдәкте уның ҡанына буянылар.

³² Шунан уны аталарына килтереп бирҙеләр: – Бына беҙ нимә табып алдыҡ! – тине улар. – Ҡара әле, был һинең улыңдың күлдәге түгелме?

³³ Яҡуп кейемде таныны: – Был улымдың күлдәге! Уны йыртҡыс талаған! Өҙгөләгәндәр, өҙгөләгәндәр Йософто!

³⁴ Яҡуп өҫтөндәге кейемен йыртҡылап, биленә ҡыл туҡыма ураны, улы өсөн хәсрәтләнеп бик оҙаҡ ваҡыт йәш түкте.

³⁵ Улдары һәм ҡыҙҙары килеп Яҡупты йыуатырға тырышты, әммә ул тынысланырға теләмәне. – Ҡара ҡайғы менән улым янына, гүргә төшәм мин! – тип бер туҡтауһыҙ иланы ла иланы.

³⁶ Ә Мидйән сауҙагәрҙәре Йософто Мысырға алып барып, унда Потифарға – фирғәүендең һарай хеҙмәтсеһенә, һаҡсылар башлығына – һатып ебәрҙеләр.