Yoobu 37 - Bibeli Gusunɔn Gari

¹ Nɑ̀ n yenibɑ kpuro wɑ, nɛn tororɑ rɑ kɑrewɑ kpɑ nɑ n diirimɔ.

² I swɑɑ dɑkio i Gusunɔn nɔɔ nɔ ɡe ɡɑ kukirimɔ nɡe ɡurɑ.

³ Gɑ nɔɔrɑ bɑɑmɑ wɔllɔ. Mɑ ɡuru mɑɑkinu nu bɑllimɔ hɑnduniɑn ɡoonu nnɛ sɔɔ.

⁴ Guru mɑɑki nin biru, Gusunɔn nɔɔ ɡɑ rɑ nɔɔre kɑ dɑm kpɑ yɑnde ɡuru mɑɑki kpɑɑnu nu sɔ̃ɔsirɑ.

⁵ Ù n ɡbɑ̃rɑ, tɔmbu bɑ rɑ biti soorewɑ. Gɑ̃ɑ bɑkɑnɑ u kuɑ mi, ni tɔnu kun kpɛ̃ u tubu.

⁶ U rɑ ɡuru kpenu sɔ̃ u nɛɛ, nu nɛɛyɔ. U rɑ mɑɑ ɡurɑn tii sɔ̃ u nɛɛ, yu nɛɛyɔ kɑ dɑm.

⁷ U rɑ de tɔmbu kpuro bu ben sɔmburu yɔ̃rɑsiɑ ɡurɑ yen sɔ̃, kpɑ bu ɡiɑ mɑ wiyɑ u ye kpuro mɔ̀.

⁸ Bɑɑ kɑ ɡbeeku yɛɛyɔ u rɑ dewɑ yi dɑ yi kpunɑ yin wɑ̃ɑ yerɔ.

⁹ Guru woo bɔkɔ ɡɑ rɑ nɛwɑ sɑɑ sɔ̃ɔ yɛ̃sɑn nɔm dwɑru ɡiɑn di, kpɑ purɑ yu nɑ sɔ̃ɔ yɛ̃sɑn nɔm ɡeu ɡiɑn di.

¹⁰ Yinni Gusunɔwɑ u rɑ nim wom wure, kpɑ mu bɔbiɑ nɡe ɡuru kperu.

¹¹ Wiyɑ u rɑ de kɑkoru tɑ n wɑ̃ɑ ɡuru wiru sɔɔ, kpɑ u tu yɑrinɑsiɑ kɑ ɡuru mɑɑkinu sɑnnu.

¹² U rɑ tu ɡɔsiewɑ nɡe mɛ u kĩ. Kpɑ tu ko nɡe mɛ u ɡeruɑ hɑnduniɑ sɔɔ.

¹³ Tɑ sɑ̃ɑwɑ nɡe bokuru te u rɑ kɑ tɔmbu sɛɛyɑsie ǹ kun mɛ u kɑ bu win kĩru sɔ̃ɔsi.

¹⁴ Yoobu, ɑ yenibɑ kpuro lɑɑkɑri koowo. A Yinni Gusunɔn sɔm mɑɑmɑɑkiɡinu mɛɛrio ɑ wɑ.

¹⁵ A yɛ̃ nɡe mɛ Gusunɔ u rɑ nu dendisinɛ, kpɑ u de ɡuru mɑɑkinu nu bɑlli ɡuru winu sɔɔ?

¹⁶ A yɛ̃ nɡe mɛ ɡuru winu nu kɑ bwɛ̃ɛ wɔllɔ? Wi u yenin bweseru kuɑ, win yɛ̃ru tɑ yibɑ mɑm mɑm.

¹⁷ Woo ɡɑ̀ n sweemɑ sɔ̃ɔ yɛ̃sɑn nɔm dwɑru ɡiɑn di, yɑm susurɑ rɑ nun ko, ɑ̀ n wunɛn yɑ̃nu doke.

¹⁸ Kɑɑ kpĩ ɑ wɔllu tɛriɑ nɡe wi, kpɑ tɑ n dɑm mɔ nɡe diɡi ye bɑ kuɑ kɑ sisu?

¹⁹ A sun sɔ̃ɔsio ye n weenɛ su Gusunɔ sɔ̃. Domi sɑ ǹ wɑ ye sɑ ko nùn wisi bɛsɛn yɛ̃ru sɑrirun sɔ̃.

²⁰ Tilɑsiwɑ bu kɑ nùn sɔ̃ nɑ̀ n ɡɑri ɡeruɑ? Tilɑsiwɑ bu kɑ nùn nɔɔsiɑ ye nɑ ɡeruɑ?

²¹ Wee u rɑ de yɑm mu tĩrɑ subɑru sɔɔ, kpɑ ɡuru winu nu n sɔ̃ɔ beruɑ. Adɑmɑ u rɑ de woo ɡu se ɡu wɔllu dɛɛrɑsiɑ.

²² Sɑɑ ye sɔɔrɑ yɑm bururɑm mu koo nɑ sɑɑ sɔ̃ɔ yɛ̃sɑn nɔm ɡeu ɡiɑn di, kpɑ mu n nùn sikerenɛ kɑ nɑnum bɑkɑm.

²³ Sɑ ǹ kpɛ̃ su Dɑm kpuroɡii tubu. Domi win dɑm mu kpɑ̃. U rɑ mɑɑ kpuro ko dee dee. U ku rɑ wi u ɡem mɔ dɑm dɔre.

²⁴ Mɛyɑ u ku rɑ mɑɑ be bɑ tii mɛɛrɑ bwisiɡibu ɡɑrisi ɡɑ̃ɑnu. Yen sɔ̃nɑ n weenɛ tɔmbu bu nùn nɑsiɑ.