Yoobu 33 - Bibeli Gusunɔn Gari

Gusunɔ u rɑ kɑ ɡɑsɔ tɔnu ɡɑri kowɑ wɑhɑlɑ sɔɔn di

¹ Elihu u nɛɛ, tɛ̃, Yoobu ɑ swɑɑ dɑkio ɑ nɛn ɡɑri kpuro nɔ.

² Wee kon nɔɔ wukiɑ n ɡɑri ɡere.

³ Geeyɑ kon nun sɔ̃, n ǹ kɑ murɑfitiru.

⁴ Gusunɔ Dɑm kpuroɡiin Hundewɑ u mɑn tɑkɑ kuɑ. Mɑ u mɑn wɑ̃ɑru wɛ̃.

⁵ A sɔɔru koowo mɛ kɑɑ kɑ tii yinɑ, kpɑ ɑ mɑn wisi ɑ̀ n kɑɑ kpĩ.

⁶ Nɛ kɑ wunɛ sɑ sɑ̃ɑwɑ tiɑ Gusunɔn wuswɑɑɔ. Domi temɑ u kɑ bɛsɛ kpuro mɔmɑ.

⁷ Ǹ n mɛn nɑ, ɑ ku nɛn bɛrum ko, kpɑ ɑ n tɑmɑɑ nɑ kĩ n nun nɛn yiiko sɔ̃ɔsiwɑ.

⁸ Adɑmɑ nɑ yɑɑye ye ɑ mɑn sɔ̃ɔwɑ. A nɛɛ,

⁹ ɑ dɛɛrewɑ mɑm mɑm ɑ ǹ durum mɔ. Tɑɑrɛ ɡɑɑ mɑɑ sɑri wunɛ sɔɔ.

¹⁰ Mɑ ɑ nɛɛ, kɑ mɛ, Gusunɔ u wunɛn torɑnu wɑɑmɔ. Mɑ u nun ɡɑrisi win yibɛrɛ.

¹¹ U ǹ derimɔ ɑ dɑ mi ɑ kĩ. Mɑ u wunɛn kookoosu kpuro lɑɑkɑri sɑ̃ɑ.

¹² Adɑmɑ nɛ, nɑ nun sɔ̃ɔmɔ mɑ ɑ ǹ ɡem mɔ ɡɑri yi sɔɔ Yoobu. Domi Gusunɔ u tɔnu kere.

¹³ Mbɑn sɔ̃nɑ ɑ kɑ nùn tɑɑrɛ wɛ̃ɛmɔ ɑ mɔ̀, u ku rɑ tɔnu wisi.

¹⁴ Gusunɔ u rɑ kɑ tɔnu ɡɑri kowɑ kɑ swɑɑ dɑbinu, ɑdɑmɑ tɔnu u ku rɑ ye lɑɑkɑri ko.

¹⁵ Gɑsɔ u rɑ kɑ nùn ɡɑri ko dosu sɔɔ wɔ̃kuru, ǹ kun mɛ kɑ̃siru sɔɔ sɑnɑm mɛ u kpĩ win kpin yerɔ u dò.

¹⁶ Miyɑ u rɑ nùn kure u kɑ nùn kirɔ ko.

¹⁷ Kpɑ u nùn ɡbɑrɑ kɔ̃sɑn di. Kpɑ u mɑɑ nùn yɑrɑ tii suɑbun di.

¹⁸ Nɡe mɛyɑ u rɑ kɑ nùn yɑre ɡɔɔn yirɑn di, kpɑ u kun mɑɑ ɡu.

¹⁹ Gɑsɔ, u rɑ mɑɑ nùn sɛɛyɑsie kɑ wɑhɑlɑ, u de bɑrɑru ɡɑru tu nùn kpĩ, win wɑsi yi n diirimɔ,

²⁰ kpɑ u kun mɑɑ dĩɑnun mɛm kĩ, bɑɑ kɑ ni u rɑ n kĩru bo.

²¹ Kpɑ u woorɑ, win kukunu nu terɑ.

²² Kpɑ ɑ deemɑ u ɡɔɔ turuku kuɑ.

²³ Gɑsɔ Gusunɔn ɡɔrɑdobɑ nɔrɔbu (1.000) sɔɔ, turo u koo se u dɑ u nùn somi, kpɑ u nùn swɑɑ ɡeɑ sɔ̃ɔsi ye n weenɛ u swĩi.

²⁴ Sɑɑ ye sɔɔ, u koo tɔnu win wɔnwɔndu wɑ kpɑ u nɛɛ, u nùn fɑɑbɑ koowo, kpɑ u ku rɑɑ ɡbi. Domi u swɑɑ wɑ ye u koo kɑ nùn yɑkiɑ.

²⁵ Kpɑ win wɑsi yi wurɑmɑ yi ko nɡe sɑnɑm mɛ u sɑ̃ɑ ɑluwɑɑsi.

²⁶ Ù n Gusunɔ kɑnɑ, u koo win kɑnɑru mwɑ. Kpɑ u Gusunɔ sɑ̃ kɑ nuku dobu, yèn sɔ̃ u nùn win wɑ̃ɑru wesiɑ.

²⁷ Kpɑ u womu ko tɔmbun wuswɑɑɔ u nɛɛ, u durum kuɑ, u ɡem yinɑ. Adɑmɑ Gusunɔ kun nùn yen sɛɛyɑsiɑbu kue.

²⁸ U win hunde wɔrɑ, u ǹ due siki wɔruɔ. Mɑ u yɑm bururɑm wɑɑmɔ.

²⁹ Yeni kpuron diyɑ Gusunɔ u rɑ kɑ tɔnu ɡɑri ko nɔn dɑbi dɑbinu,

³⁰ u kɑ nùn ɡɔɔ ɡbɑrɑ, kpɑ u de u n wɑ̃ɑ wɑ̃ɑru sɔɔ.

³¹ Tɛ̃, ɑ mɑn swɑɑ dɑkio, Yoobu. A den mɑrio mɛ, kpɑ n mɑɑ ɡɑri ɡere.

³² À n ɡɑri ɡɛɛ mɔ ɑ kɑ mɑn wisi, ɑ mɑn wisio. Domi nɛn kĩrɑ n kɑ nun ɡem wɛ̃.

³³ À kun mɑɑ ɡɛɛ mɔ ɑ ɡere, ɑ mɑn swɑɑ dɑkio. A mɑrio, kpɑ n nun bwisi kɛ̃.