Yoobu 17 - Bibeli Gusunɔn Gari

Yoobu kun mɑɑ yĩiyɔbu mɔ

¹ Yoobu u nɛɛ, nɑ wɛ̃siɑmɔ kɑ wɑhɑlɑ, nɛn wɑ̃ɑrɑ kpeeyɔ. Siki wɔru ɡɑ mɑn mɑrɑ.

² Tɔn yɑɑko kowobu bɑ mɑn kooro bure. Bɑ mɑn nɔɔ kuurimɔ beri berikɑ.

³ Yinni Gusunɔ, ɑ de wunɛn tii ɑ mɑn mɔru bɑrɑ. Mɑ n kun mɔ wunɛ, wɑrɑ u koo mɑn sɑnnɑ.

⁴ A ben bwisi wunɑ. A ku de bu nɑsɑrɑ wɑ.

⁵ Bɑ sɑ̃ɑwɑ nɡe tɔnu wi mɔn teni tɑ kɑ yɑ̃, te tɑ nɛɛ, u win kpɑɑsibu dim sokɑ, mɑ win bibu bɑ kɑ ɡɔ̃ɔru sɔ̃.

⁶ Bɑ mɑn womusu doke, bɑ mɑn yɑ̃ɑtɑm siemɔ.

⁷ Nɛn nɔni yi ǹ mɑɑ do, nuku sɑnkirɑnun sɔ̃. Mɑ nɛn wɑsi yi dɑm dwiiyɑ, yi doonɔ nɡe sɑɑru.

⁸ Gemɡibu bɑ biti soore nɛn wɑhɑlɑ yenin sɔ̃. Tɑɑrɛ sɑriruɡibu bɑ koo tɔn kɔ̃sobu seesi.

⁹ Wi u sɑ̃ɑ ɡemɡii u koo yɔ̃rɑwɑ dim dim win swɑɑ sɔɔ. Kpɑ wi u dɛɛre, u tii dɑm kɛ̃ u sosi.

¹⁰ Adɑmɑ bɛɛ nɛn kpɑɑsibu kpuro, i wurɑmɑ i mɑɑ ɡɑri sɑɑri nɛn wuswɑɑɔ. Kɑ mɛ, nɑ ǹ ɡoo wɑsi bɛɛ sɔɔ wi u bwisi mɔ.

¹¹ Nɛn wɑ̃ɑru tɑ kpɑ. Wee himbɑ ye nɑ rɑɑ sɑ̃ɑ ye kpuro yɑ kɑm kuɑ.

¹² Nɛn kpɑɑsibɑ tɑmɑɑ wɔ̃kurɑ sɑ̃ɑwɑ sɔ̃ɔ sɔɔ. Sɔ̃ɔ ù n duɔ, kpɑ bu nɛɛ, yɑm sɑ̃rɑmɑwɑ.

¹³ Gɔribun wɑ̃ɑ yerɑ nɑ mɑrɑ tu ko nɛn wɑ̃ɑ yeru. Yɑm wɔ̃kuru sɔɔrɑ kon nɛn kpin yeru yi.

¹⁴ Kon siki wɔru sɔ̃ n nɛɛ, ɡeyɑ ɡɑ sɑ̃ɑ nɛn tundo. Kpɑ n mɑɑ kɔkɔnu sɔ̃ n nɛɛ, niyɑ nu sɑ̃ɑ nɛn mɛro kɑ nɛn sesubu.

¹⁵ Mɑnɑ nɑ mɑɑ yĩiyɔbu mɔ. Wɑrɑ u koo kpĩ u bu wɑ.

¹⁶ Bɑ koo sɑrɑ ɡɔribun wɑ̃ɑ yerɔ, kpɑ su dɑ tuɑ sɔɔ sɑnnu.