Yoobu 10 - Bibeli Gusunɔn Gari

Yoobu u nɛɛ, Gusunɔ u nùn mɑrɑ u kɑ nùn kɑm koosiɑ

¹ Wɑ̃ɑrɑ mɑn tusɑ. Nɑ ǹ nɛn weeweenu yɔ̃rɑsiɑmɔ. Kon ɡerewɑ wɑhɑlɑ ye nɑ mɔ̀.

² Kpɑ n Gusunɔ sɔ̃ n nɛɛ, ɑ ku mɑn tɑɑrɛ wɛ̃. A de n ɡiɑ yèn sɔ̃ ɑ mɑn nɔni swɑ̃ɑru kpɛ̃ɛ.

³ Yinni Gusunɔ, n nun wɛ̃re ɑ kɑ mɑn kɔ̃sɑ kuɑ, nɛ wi nɑ sɑ̃ɑ wunɛn nɔmɑn tɑkɑ koorɑ, kpɑ ɑ sere de ɡɑri yi tɔn kɔ̃sobɑ bɔkuɑ yi koorɑ?

⁴ Tɔnun nɔniyɑ ɑ mɔ? A rɑ yɑm wɑwɑ nɡe tɔnu?

⁵ Wunɛn wɑ̃ɑrun tɔ̃nu nu ko n sɑ̃ɑwɑ nɡe tɔnuɡinu? Wunɛn wɑ̃ɑrun wɔ̃su, su nɔru mɔwɑ nɡe tɔnuɡisu?

⁶ Mbɑn sɔ̃nɑ ɑ kɑsu ɑ kɑ nɛn kɔ̃sɑ ɡiɑ. Mbɑn sɔ̃nɑ ɑ hɑniɑ mɔ̀ ɑ kɑ nɛn torɑru wɑ.

⁷ A yɛ̃ mɑ nɑ ǹ sɑ̃ɑ tɔn kɔ̃so. Goo kun mɑɑ kpɛ̃ u mɑn wɔrɑ wunɛn nɔmɑn di.

⁸ Wunɛn nɔmɑ yɑ mɑn mɔmɑ yɑ tɑkɑ kuɑ mɑm mɑm. Yerɑ kɑɑ mɑn kpeerɑsiɑ?

⁹ A yɑɑyo mɑ wunɑ ɑ mɑn mɔmɑ nɡe mɛ bɑ rɑ ɡɑ̃ɑnu mɔm kɑ sɔndu. Yerɑ ɑ kĩ ɑ mɑn kpeerɑsiɑ, n ɡɔsiɑ tuɑ?

¹⁰ Wunɑ ɑ mɑn mɔmɑ nɛn mɛron nukurɔ nɡe mɛ bom mu rɑ sinum ko ɡbɛ̃ɛru sɔɔ mu ɡɔsiɑ ɡɑsɑru.

¹¹ Wunɑ ɑ nɛn wɑsin kukunu kɑ yin sĩinu kuɑ, mɑ ɑ nu yɑɑ bɑɑsi kɑ ɡɔnɑ wukiri.

¹² A mɑn wɑ̃ɑru wɛ̃ wunɛn durom sɔ̃. Mɑ ɑ tu nɛnusi ɑ kɔ̃su.

¹³ Adɑmɑ ye ɑ rɑɑ mɑn beruɑmmɛ wunɛn ɡɔ̃ruɔ, nɑ ye ɡiɑ.

¹⁴ Nɑ̀ n torɑ, ɑ rɑ n mɑn mɛɛrɑ, ɑ ku rɑ mɑn yen suuru kue.

¹⁵ Nɑ̀ n sɑ̃ɑn nɑ tɔn kɔ̃so, nɑ kuɑ bɔ̃ruro. Nɑ̀ n mɑɑ dɛɛren nɑ, nɑ ǹ mɑɑ wiru seeyɑmɔ, domi sekurɑ mɑn mɔ̀, mɑ nɑ nɔni swɑ̃ɑru nɔɔrɑmɔ.

¹⁶ Nɑ̀ n wiru seeyɑ, ɑ rɑ mɑn nɑɑ ɡire nɡe ɡbee sunɔ, kpɑ ɑ mɑn so ɑ surɑ kɑ wunɛn sɔm mɑɑmɑɑkiɡiɑ.

¹⁷ A mɑɑ mɑn nɔni swɑ̃ɑru suremɔ ɑ sɔnnɑmɔ, mɑ ɑ wunɛn mɔru sosimɔ. A derɑ yibɛrɛbɑ bɑ nɑ bɑ mɑn tɑbu wɔri.

¹⁸ Mbɑn sɔ̃nɑ ɑ mɑn yɑrɑ nɛn mɛron nukurun di. N dɑɑ burɑm bo n ɡbi mi, kpɑ ɡoo u kun mɑn wɑ.

¹⁹ Kpɑ nɑ n sɑ̃ɑ nɡe wi u kun dɑɑ wɑ̃ɑ, domi nɑ kon dɑɑ duɑwɑ siki wɔruɔ sɑnɑm mɛ nɑ yɑrɑ nɛn mɛron nukurun di.

²⁰ Wɑ̃ɑ te tɑ mɑn tie, tɑ ǹ mɑɑ kpɑ̃. Yen sɔ̃, ɑ mɑn derio n nuku dobu ko sɑɑ fiiko ye sɔɔ,

²¹ n sere dɑ ɡɔriɔ mi yɑm wɔ̃ku bɑkɑrɑ wɑ̃ɑ, mi nɑ̀ n dɑ, nɑ ǹ mɑɑ wee.

²² Tem mi, yɑm wɔ̃ku bɑkɑrɑ tɑ wɑ̃ɑ kɑ mɑɑ burisinɑɑ. Yɑm bururɑm mɛ mu wɑ̃ɑ mi, mu sɑ̃ɑwɑ yɑm wɔ̃ku bɑkɑru.