Yeremi 10 - Bibeli Gusunɔn Gari

Bũnu kɑ Yinni Gusunɔ

¹ Bɛɛ Isirelibɑ, i swɑɑ dɑkio i nɔ ye Yinni Gusunɔ u bɛɛ sɔ̃ɔmɔ. U nɛɛ,

² i ku bwese tukunun yirɑ swĩi. I ku wururɑ wɔllun yĩre nin sɔ̃, ni bwese tukunu nù n wɑ, nu rɑ nɑnde.

³ Domi bwese nin sɑ̃ɑru tɑ sɑ̃ɑwɑ kɑm dirum. Nu rɑ sewɑ nu dɑ dɑ̃ɑ sɔ̃ɔwɔ nu dɑ̃ɑ burɑ. Kpɑ dɑ̃ɑ dɑ̃ko u kɑ ye bwɑ̃ɑroku ko.

⁴ Kpɑ bu ɡu burɑru kuɑ, bu ɡu sii ɡeesu kɑ wurɑ pote. Kpɑ bu ɡirɑ bu kulumbɑ kpɑre kɑ mɑtɑlɑkɑ, ɡu ku kɑ wɔrumɑn sɔ̃.

⁵ Bwɑ̃ɑrokunu nu rɑ n sɑ̃ɑwɑ nɡe nɑre ye bɑ rɑ ko ɡberɔ. Nu ǹ ɡɑri mɔ̀, bɑ rɑ n nu sɔɔwɑwɑ, domi nu ǹ kpɛ̃ nu kɑ tii sĩ. Yen sɔ̃, i ku nin bɛrum ko. Nu ǹ kpɛ̃ nu bɛɛ kɔ̃sɑ ǹ kun mɛ ɡeɑ kuɑ.

⁶ Mɑ Yeremi u Gusunɔ siɑrɑ u nɛɛ, Yinni Gusunɔ, ɑ kpɑ̃. Goo sɑri wi u kɑ nun weenɛ. Mɑ ɑ yĩsiru yɑrɑ wunɛn dɑm sɑɑbu.

⁷ Wunɑ ɑ sɑ̃ɑ bwesenu kpuron sinɑ boko. Wɑrɑ u ǹ koo nun nɑsiɑ. Wunɑ ɑ yiiko kpuro mɔ. Bwesenu kpuron bwisiɡibu sɔɔ, ɡoo sɑri wi u kɑ nun weenɛ.

⁸ Be kpuro bɑ ǹ bwisi mɔ. Ben yɛ̃ru tɑ sɑ̃ɑwɑ kɑm. Domi dɑ̃rɑ bɑ rɑ dɑ̃ku bɑ n sɑ̃ɑmɔ.

⁹ Kpɑ bu tu sii ɡeesu pote, si bɑ kɑ nɑ Tɑɑsisin di, ǹ kun mɛ wurɑ ye yɑ wee Ufɑsin di, kpɑ bu tu yɑbe ɡɑɑdurɑɡiru kɑ wunɔmɡiru sebusiɑ. Yebɑ kpuro yɑ sɑ̃ɑwɑ tɔnun nɔmɑn sɔmburu.

¹⁰ Adɑmɑ wunɛ Yinni Gusunɔ, ɑ sɑ̃ɑwɑ Yinni, wunɑ n weenɛ bu sɑ̃. A wɑ̃ɑwɑ. Kɑɑ n mɑɑ bɑndu diiwɑ sere kɑ bɑɑdommɑɔ. Wunɛn mɔru yɑ̀ n seewɑ, tem mu rɑ yĩiriwɑ, kpɑ bwesenu kpuro nu kpɑnɑ nu yɔ̃rɑ wunɛn wuswɑɑɔ.

¹¹ Bɛɛ bwese tukunu, i swɑɑ dɑkio i nɔ, bɛɛn bũu ni, nu ǹ wɔllu kɑ tem tɑkɑ kue. Nin tii nu koo kɑm kowɑ mɑm mɑm.

¹² Yinni Gusunɔwɑ u tem tɑkɑ kuɑ kɑ win dɑm, kɑ win yɛ̃ru, mɑ u wɔllu tɛriɑ kɑ win bwisi.

¹³ Wiyɑ u rɑ de bukɔ ɡu se wɔllɔ, kpɑ u woo seeyɑmɑ sɑɑ ɡen wɑ̃ɑ yerun di, kpɑ ɡuru winu nu nim kpɑɑsinɑ, kpɑ ɡuru mɑɑkinu nu koorɑ, kpɑ ɡurɑ yu nɛ.

¹⁴ Tɔnu ù n ye kpuro mɛɛrɑ, u rɑ biti soorewɑ. Sekuru tɑ rɑ mɑɑ sekobu mwɛwɑ bɑ̀ n ben bwɑ̃ɑroku ni wɑ. Domi nu ǹ kpɛ̃ nu ko mɛ, nu ǹ wɛ̃siɑru mɔ.

¹⁵ Bɑ nu kuɑwɑ bu kɑ tɔmbu nɔni wɔ̃ke. Nu ǹ sɑ̃ɑ ɡɑ̃ɑnu. Nu koo kɑm ko sɔ̃ɔ teeru, dɔmɑ te Yinni Gusunɔ u koo nu siri.

¹⁶ Gusunɔ, Isirelibɑn Yinni u ǹ sɑ̃ɑ nɡe ni. Domi wiyɑ u kpuro tɑkɑ kuɑ. Wiyɑ u sɑ̃ɑ win tɔmbun ɑrumɑni. Win yĩsirɑ Gusunɔ, wɔllu kɑ tem Yinni.

Yerusɑlɛmun wɔrumɑɑ yɑ turuku kuɑ

¹⁷ Yeremi u nɛɛ, bɛɛ Yerusɑlɛmuɡibu, wee, yibɛrɛ bɑ bɛɛ tɑrusi. I seewo i bɛɛn yɑ̃nu kpɑɑsinɑ.

¹⁸ Domi Yinni Gusunɔ u nɛɛ, u koo de yibɛrɛ be, bu bɛɛ wɔri, kpɑ bu bɛɛ ɡurɑ bu kɑ bɛɛ dɑ mi n tomɑ.

¹⁹ Yerusɑlɛmuɡibu bɑ wuri wɔri bɑ mɔ̀, sɑ kɑm kuɑ. Wee, bɛsɛn bosu kpɛ̃ɑ, bɛsɛn nɔni swɑ̃ɑrɑ bɑndɑ. Sɑ rɑɑ nɛɛ, kɔ̃sɑ yɑ̀ n sun deemɑ, sɑ ko kpĩ su ye mɑ.

²⁰ Adɑmɑ bɛsɛn diɑ yɑ wɔrukɑ. Yen wɛ̃ɛ kpuro kɑsikirɑ. Mɑ bɑ bɛsɛn bibu ɡurɑ kpuro. Goo sɑri wi u koo mɑɑ bɛsɛn wuu seeyɑ.

²¹ Yerɑ Yeremi u nɛɛ, bɛɛn kpɑrobu bɑ kuɑ ɡɑri bɑkɑsu. Bɑ ǹ Yinni Gusunɔ kɑsu. Yen sɔ̃nɑ bɑ ǹ kuure, mɑ bɛɛ kpuro i yɑrinɑ.

²² Wee dɑmu ɡɑɡu ɡɑ nɔɔrɑmɔ. Tɔn dɑbirɑ wee sɑɑ sɔ̃ɔ yɛ̃sɑn nɔm ɡeu ɡiɑn di, bu kɑ Yudɑbɑn wusu kpeerɑsiɑ, kpɑ su ko ɡbeeku bɔ̃nun wɑ̃ɑ yeru.

Yeremi u kɑnɑru mɔ̀ kɑ win tɔmbun yĩsiru

²³ Yinni Gusunɔ, nɑ yɛ̃ mɑ tɔnu kun kpɛ̃ u win tii kpɑrɑ nɡe mɛ n weenɛ. Goo sɑri wi u koo kpĩ u win tii swɑɑ ɡeɑ sure.

²⁴ Yinni Gusunɔ, ɑ mɑn sɛɛyɑsio sɑkɑ sɔɔ, n kun kɑ mɔru, kpɑ ɑ ku rɑ mɑn kɑm koosiɑ.

²⁵ A wunɛn mɔru sureo bwese ni nu ǹ nun mɛm nɔɔwɑmmɛn mi, ni, ni nu ǹ nun sɑ̃ɑmɔ. Domi nu wunɛn tɔmbu Yɑkɔbun bweseru kpeerɑsiɑmɔ, nu ben tem bɑnsu koosiɑmɔ.