Womusu 98 - Bibeli Gusunɔn Gari

¹ I Yinni Gusunɔ wom kpɔɔ kuo, domi u sɔm mɑɑmɑɑkiɡinu kuɑ. Win dɑm sɑɑbu u nɑsɑrɑ wɑ.

² Yinni Gusunɔ u tɔmbu win fɑɑbɑn ɡɑri tubusiɑ. U sɔ̃ɔsi mɑ u sɑ̃ɑ ɡemɡii.

³ U win durom kɑ win bɔrɔkiniru yɑɑyɑ Isirelibɑn sɔ̃. Hɑnduniɑn ɡoonu nnɛ kpuro sɔɔ bɑ win fɑɑbɑ ye wɑ.

⁴ Bɛɛ hɑnduniɑɡibu kpuro, i nɔɔɡiru suo kɑ nuku dobu. I nuku dobun kuuki koowo i kɑ nùn siɑrɑ i nùn tɔmɑ kɑ womusu.

⁵ I nùn womusu kuo kɑ mɔrɔkunu. I nùn tɔmɔ kɑ ɡɔ̃ɔɡenu.

⁶ I nùn womusu kuo kɑ kɔbi kɑ ɡuunu. I tɑki koowo wi, sinɑ bokon wuswɑɑɔ kɑ nuku dobu.

⁷ Nim wɔ̃ku kɑ ye yɑ wɑ̃ɑ ɡe sɔɔ, yu nɔɔɡiru suo. Tem kɑ ye yɑ wɑ̃ɑ mɛ sɔɔ, yu womu koowo.

⁸ Dɑɑ bɑkɑnu nu tɑki koowo. Guunu nu nuku dobun kuuki koowo sɑnnu sɑnnu Yinni Gusunɔn wuswɑɑɔ.

⁹ Domi u wee u hɑnduniɑɡibu siri. U koo bu siriwɑ ɡem sɔɔ.