Womusu 91 - Bibeli Gusunɔn Gari

¹ Wunɛ wi Wɔrukoo u kɔ̃su, ɑ wɛ̃rewɑ Dɑm kpuroɡiin tɔbuɔ.

² Kon Yinni Gusunɔ sɔ̃ mɑ wiyɑ nɛn kuku yeru kɑ nɛn kɑ̀rì. Wiyɑ nɛn Yinni wi nɑ nɑɑnɛ sɑ̃ɑ.

³ Domi wiyɑ u nun wɔrɑmɔ sɑɑ tɑɑn di. Wiyɑ mɑɑ nun wɔrɑmɔ sɑɑ kɛ̃si kɛ̃si ɡɔɔ kɑ win wɑhɑlɑn di.

⁴ U koo nun win sɑnsu wukiri. Kɑɑ kuku yeru wɑ win kɑsɑn sɔɔwɔ. Win bɔrɔkinirɑ sɑ̃ɑwɑ nɡe tɛrɛru kɑ tɑrɑkpe.

⁵ Wɔ̃kurun kɑri ǹ kun mɛ sɛ̃u ɡe ɡɑ wee sɔ̃ɔ sɔɔ, yen ɡɑɑ kun nun bɛrum mɔ̀.

⁶ Kɛ̃si kɛ̃si ɡɔɔ wi u bɔsu wɔ̃kuru, ǹ kun mɛ bɑrɑ te tɑ tɔmbu ɡoomɔ sɔ̃ɔ sɔɔ ɡbɑ̃ɑrɑ, yen ɡɑɑ kun nun bɛrum mɔ̀.

⁷ Bɑɑ bɑrɑ ni, nù n tɔmbu nɔrɔbu (1.000) ɡo wunɛn bɔkuɔ, mɑ nu tɔmbu nɔrɔbun subɑ wɔkuru (10.000) wɔri wunɛn nɔm ɡeuɔ, ɡɑ̃ɑnu kun nun bɑbɑmɔ.

⁸ Nɔniyɑ kɑɑ kɑ mɛɛri tɔnɑ kpɑ ɑ tɔn kɔ̃sobun ɑre wɑ.

⁹ Yèn sɔ̃ Yinni Gusunɔ u kuɑ wunɛn kuku yeru, mɑ wi, Wɔrukoo u kuɑ wunɛn wɑ̃ɑ yeru,

¹⁰ yen sɔ̃nɑ nɔni swɑ̃ɑru ɡɑrɑ kun nun sisie, bɑrɑru ɡɑrɑ kun mɑɑ wunɛn yɛnu susiɔ.

¹¹ Domi u koo win ɡɔrɑdobɑ nɔɔ kɛ̃ wunɛn sɔ̃, bɑ n nun kɔ̃su wunɛn swɛɛ kpuro sɔɔ,

¹² bu nun nɛnɛ kɑ ben nɔmɑ kpɑ ɑ ku rɑ kɑ wunɛn nɑɑsu kperu sokurɑ.

¹³ Kɑɑ ɡbee sunɔ kɑ surɔkɔru yɔ ɑ sɑrɑ, kpɑ ɑ ɡbee sunɔ kpɛmu kɑ yɑɑ ɡɔbɑ tem tɑɑre.

¹⁴ Yinni Gusunɔ u nɛɛ, yèn sɔ̃ u mɑn kĩ, kon nùn yɑkiɑ kpɑ n nùn kɔ̃su domi u nɛn yĩsiru yɛ̃.

¹⁵ Ù n mɑn sokɑ kon nùn wurɑri. Ko nɑ n wɑ̃ɑ kɑ wi nɔni swɑ̃ɑrun sɑɑ. Kon nùn yɑkiɑ kpɑ n nùn bɛɛrɛ wɛ̃.

¹⁶ Kon de u tɔkɔru ko bɔri yɛndu sɔɔ, kpɑ n nùn nɛn fɑɑbɑ sɔ̃ɔsi.