Womusu 86 - Bibeli Gusunɔn Gari

¹ Dɑfidi u kɑnɑru kuɑ u nɛɛ, Yinni Gusunɔ, ɑ mɑn swɑɑ dɑkio kpɑ ɑ nɛn kɑnɑru nɔ. Wee nɑ sɑ̃ɑru kɑ wɔnwɔndu soore.

² A nɛn hunde beruo, domi nɑ rɑ nun sɑ̃. Gusunɔ, nɑ nun nɑɑnɛ sɑ̃ɑ, ɑ mɑn fɑɑbɑ koowo.

³ Yinni, wunɑ nɑ rɑ nɔɔɡiru sue bɑɑdommɑ. A mɑn wɔnwɔndu kuo.

⁴ Yinni, ɑ mɑn nuku dobu wɛ̃ɛyɔ. Wunɑ nɑ rɑ n kɑnɑmɔ kɑ nɛn ɡɔ̃ru kpuro.

⁵ Yinni, ɑ sɑ̃ɑwɑ tɔn ɡeo, ɑ rɑ mɑɑ tɔmbu ben durum wɔke. A rɑ be bɑ nun soku kpuro kĩru sɔ̃ɔsi tɑ n kpɑ̃.

⁶ Yinni Gusunɔ, ɑ nɛn kɑnɑru nɔɔwɔ. A nɛn weeweenu swɑɑ dɑkio.

⁷ Domi nɑ̀ n nun kɑnɑ nɔni swɑ̃ɑrun sɑɑ, ɑ rɑ mɑn wisi.

⁸ Gɑ̃ɑnu sɑri ni nu kɑ nun weenɛ ye bɑ rɑ sɑ̃ kpuro sɔɔ. Gɑ̃ɑnu mɑɑ sɑri ni nu kɑ wunɛn sɔmɑ weenɛ.

⁹ Bwese ni ɑ tɑkɑ kuɑ kpuro nu koo nɑ nu yiirɑ wunɛn wuswɑɑɔ, kpɑ nu wunɛn yĩsiru bɛɛrɛ wɛ̃.

¹⁰ Domi ɑ kpɑ̃, ɑ rɑ mɑɑ sɔm mɑɑmɑɑkiɡinu ko. Wunɛ turowɑ ɑ sɑ̃ɑ Gusunɔ.

¹¹ Yinni Gusunɔ, ɑ mɑn wunɛn swɛɛ sɔ̃ɔsio, kpɑ n wɑ n sĩ wunɛn ɡem sɔɔ. A de n wunɛn yĩsiru nɑsiɑ.

¹² Gusunɔ nɛn Yinni, kon nun siɑrɑ kɑ nɛn ɡɔ̃ru kpuro, kpɑ n nun bɛɛrɛ wɛ̃ sere kɑ bɑɑdommɑɔ.

¹³ Domi ɑ mɑn durom bɑkɑm kuɑ, ɑ mɑn yɑrɑ ɡɔribun wɑ̃ɑ yerun sɔɔ sɔɔn di.

¹⁴ Yinni Gusunɔ, tii suobu bɑ mɑn seesi. Tɔn kɔ̃sobu bɑ kĩ bu mɑn hunde wunɑ, be, bèn bwisikunu ku rɑ n wɑ̃ɑ wunɛn mi ɡiɑ.

¹⁵ Adɑmɑ wunɛ Gusunɔ, ɑ sɑ̃ɑwɑ Yinni wɔnwɔnduɡii. A ku rɑ mɔru se fuuku. Wunɛn kĩru tɑ kpɑ̃. A mɑɑ sɑ̃ɑwɑ bɔrɔkini.

¹⁶ A mɑn mɛɛrimɑ kpɑ ɑ nɛn wɔnwɔndu wɑ. A nɛ, wunɛn sɔm kowo dɑm kɛ̃ɛyɔ, kpɑ ɑ mɑn fɑɑbɑ ko nɛ, wunɛn sɔm kowon bii.

¹⁷ Yinni Gusunɔ, ɑ mɑn yĩreru sɔ̃ɔsio te tɑ koo mɑn koorɑ, kpɑ ɑ de nɛn yibɛrɛbɑ bu ye wɑ kpɑ sekuru tu bu mwɑ. Domi wunɑ ɑ rɑ mɑn fɑɑbɑ ko, kpɑ ɑ mɑn nukuru yɛmiɑsiɑ.