Womusu 79 - Bibeli Gusunɔn Gari

¹ Womu ɡe Asɑfu u kuɑ. Ge wee. Gusunɔ, wee tɔn tukobu bɑ wunɛn tem wɔri. Bɑ derɑ wunɛn sɑ̃ɑ yeru tɑ disi duurɑ. Bɑ derɑ Yerusɑlɛmu yɑ kuɑ bɑnsu.

² Bɑ wunɛn tɔmbu ɡo, mɑ bɑ derɑ ɡunɔsu ben ɡonu di. Bɑ derɑ ɡbeeku yɛɛ yi be, be bɑ nun sɑ̃ɑmɔ min ɡonu temɑ.

³ Bɑ ben yɛm yɑri mu kɑ Yerusɑlɛmu sikerenɛ nɡe nim, mɑ bɑ ben ɡonu deri mi, ɡoo kun nu sikuɑ.

⁴ Be bɑ kɑ sun sikerenɛ bɑ sun wɔmmɔ. Bɛsɛn berusebu bɑ sun yɑɑkoru mɔ̀.

⁵ Yinni Gusunɔ, sere sɑɑ yerɑ̀ wunɛn mɔru ko n seewɑ. Sere sɑɑ yerɑ̀ kɑɑ n nisinu seewɑ nɡe dɔ̃ɔ.

⁶ A de wunɛn mɔru yu wɔri bwese ni nu ǹ nun yɛ̃ kɑ ni nu ǹ nun sɑ̃ɑmɔ sɔɔ.

⁷ Domi bɑ Isirelibɑ ɡo, mɑ ben tem mu kuɑ bɑnsu.

⁸ A ku sun bɛsɛn sikɑdobɑn durum sɔbi. Adɑmɑ wunɛn kĩrun sɔ̃, ɑ sun wɔnwɔndu kuo. Domi sɑ kuɑ wɔnwɔndobu.

⁹ Gusunɔ bɛsɛn fɑɑbɑ kowo, ɑ sun somiɔ kpɑ wunɛn yĩsiru tu bɛɛrɛ wɑ. A sun wɔro kpɑ ɑ sun bɛsɛn durum wɔkɑ.

¹⁰ Mbɑn sɔ̃nɑ kɑɑ de bwesenu nu n mɔ̀, mɑnɑ bɛsɛn Yinni u wɑ̃ɑ. A be bɑ wunɛn tɔmbun yɛm yɑri mɔru kɔsieyo bwesenun suunu sɔɔ bɛsɛn wuswɑɑɔ.

¹¹ Yinni Gusunɔ, ɑ dɛsobun weeweenu nɔɔwɔ, kpɑ ɑ be bɑ kɑ dɔɔ bu ɡo fɑɑbɑ ko kɑ wunɛn dɑm.

¹² Yinni, bwese ni nu kɑ nun sikerenɛ nu nun wɔnwɑ, ɑ nu nin durum kɔsieyo sere nɔn nɔɔbɑ yiru.

¹³ Adɑmɑ bɛsɛ wunɛn tɔn be ɑ kpɑre, sɑ ko nun tɔmɑ sere kɑ bɑɑdommɑɔ, kpɑ bɛsɛ kɑ bɛsɛn bibun bweseru sɑ n nun bɛɛrɛ wɛ̃ɛmɔ.