Womusu 76 - Bibeli Gusunɔn Gari

¹ Womu ɡe Asɑfu u wom kowobun wiruɡii kuɑ kɑ mɔrɔku. Ge wee.

² Bɑ Gusunɔ tubɑ Yudɑɔ, mɑ u yĩsiru yɑrɑ Isireliɔ.

³ Win wɑ̃ɑ yerɑ wɑ̃ɑwɑ Sɑlɛmuɔ ye bɑ mɔ̀ Siɔni.

⁴ Miyɑ u tɑbu yɑ̃nu bɔɔkɑ. Niyɑ, sɛ̃ɛnu kɑ tɛrɛnu kɑ tɑkobibɑ.

⁵ Yinni Gusunɔ, ɑ sɑ̃ɑwɑ wi bɑ koo nɑsiɑ. Wunɛn nɑnum mu kpɑ̃ mu kere ɡuu ni nu wɑ̃ɑ sɑɑ yellun di.

⁶ Bɑ tɑbu durɔ wɔruɡɔbɑn yɑ̃nu potirɑ. Wee bɑ kpunɑ bɑ ɡu. Bɑ kpɑnɑ bu kɑ tii yinɑ be, be bɑ rɑɑ dɑm mɔ mi.

⁷ Gusunɔ Yɑkɔbun Yinni, ye ɑ ɡbɑ̃rɑ, yerɑ mɑɑsɔbɑ wɔrukɑ kɑ ben dumi.

⁸ Gusunɔ, wunɑ bɑ koo nɑsiɑ. Wunɛn mɔru yɑ̀ n seewɑ wɑrɑ u koo kpĩ u yɔ̃rɑ wunɛn wuswɑɑɔ.

^9-10 Wunɛn siribu nɔɔrɑ sɑɑ wɔllun di. Sɑnɑm mɛ ɑ seewɑ ɑ tɔmbu siri, mɑ ɑ be bɑ tii kɑwe fɑɑbɑ kuɑ, yerɑ hɑnduniɑn tɔmbu kpuro bɑ bɛrum soorɑ mɑ bɑ tii deri sɛ̃ɛ.

¹¹ Bɑɑ tɔnun mɔru yɑ̀ n seewɑ, wunɛn yiikowɑ yɑ koo sɔ̃ɔsirɑ. Be bɑ mɑɑ yɑrɑ wunɛn mɔrun di, bɑ koo yen tɔ̃ɔ bɑkɑru diwɑ.

¹² I Gusunɔ bɛɛn Yinni nɔɔ mwɛɛnu kuo kpɑ i nu yibiɑ. Bɛɛ be i kɑ nùn sikerenɛ i nùn nɑsie, i kɑ nùn kɛ̃nu nɑɑwɔ.

¹³ Wiyɑ u rɑ sinɑm be bɑ tii sue kɑwe. Sinɑmbu kpuro bɑ nùn nɑsie.