Womusu 75 - Bibeli Gusunɔn Gari

¹ Womu ɡe Asɑfu u wom kowobun wiruɡii kuɑ ɡe bɑ mɔ̀, ɑ ku kɑm koosiɑ. Ge wee.

² Gusunɔ, sɑ nun siɑrɑ. Wunɛn yĩsiru tɑ yibɑ bɛsɛn nɔɔwɔ. Sɑ wunɛn sɔm ɡeerun ɡɑri kpɑrɑmɔ.

³ Wunɛ, Yinni Gusunɔ, ɑ nɛɛ, sɑɑ ye ɑ yi yɑ̀ n tunumɑ, kɑɑ tɔmbu siri ɡem sɔɔ.

⁴ Tem mu koo kpĩ mu yĩiri kɑ ye yɑ wɑ̃ɑ mɛ sɔɔ. Adɑmɑ wunɑ ɑ yen ɡberebɑ nɛni.

⁵ A nɛɛ, be bɑ tii sue bu ku mɑɑ tii suɑ. A mɑɑ tɔn kɔ̃sobu sɔ̃ɔmɔ bu tii suɑbu derio.

⁶ Bu ku tii wɔlle suɑ, kpɑ bu tɔn biɑ ɡɑri de.

⁷ Domi wɔlle suɑbu kun wee sɑɑ sɔ̃ɔ yɑri yerun di, ǹ kun mɛ sɔ̃ɔ duu yerun di, bu ǹ mɑɑ wee sɔ̃ɔ yɛ̃sɑn nɔm dwɑru ɡiɑn di.

⁸ Wunɛ Gusunɔwɑ ɑ rɑ tɔmbu siri. Wunɑ ɑ rɑ ɡɑbu kɑwe kpɑ ɑ ɡɑbu wɔlle suɑ.

⁹ Yinni Gusunɔ, ɑ nɔrɑ nɛni yɑ tɑm yibɑ mu ɡbisimɔ, mɑ ɑ mu hɑnduniɑn tɔn kɔ̃sobu wɛ̃ɛmɔ. Bɑ koo mu nɔwɑ mɑm mɑm sere kɑ mɛn kɔtɔrɔ.

¹⁰ Adɑmɑ nɛ, nɑ ǹ nɔɔ mɑrimɔ. Kon Gusunɔ Yɑkɔbun Yinni tɔmɑwɑ kɑ womusu.

¹¹ U koo tɔn kɔ̃sobun tii suɑbu kpeerɑsiɑ, kpɑ u be bɑ nùn mɛm nɔɔwɑmmɛ kuurɑsiɑ.