Womusu 71 - Bibeli Gusunɔn Gari

¹ Yinni Gusunɔ, wunɛn miyɑ nɑ kuku yeru kɑsu. A ku de n sekuru wɑ bɑɑ fiiko.

² Wunɛ wi ɑ rɑ siri dee dee, ɑ mɑn wɔro kpɑ ɑ mɑn fɑɑbɑ ko. A mɑn swɑɑ dɑkio, kpɑ ɑ mɑn somi.

³ A de ɑ n sɑ̃ɑ nɛn kpee bɑɑ mi kon kuke. Kpɑ nɑ n wɑ̃ɑ mi bɑɑdommɑ. Wunɑ ɑ ɡɔ̃ru doke ɑ mɑn fɑɑbɑ ko. Domi ɑ sɑ̃ɑwɑ nɛn kuku yeru nɡe kpee bɑɑ dɑmɡiɑ.

⁴ Gusunɔ nɛn Yinni, ɑ mɑn wɔro tɔn kɔ̃sobun nɔmɑn di kɑ nuku kɔ̃suruɡibun nɔmɑn di.

⁵ Domi wunɛ sɔɔrɑ nɑ yĩiyɔbu mɔ. Sɑɑ nɛn piiburun di, wunɑ nɑ nɑɑnɛ sɑ̃ɑ.

⁶ Sɑɑ dɔmɑ tèn di bɑ mɑn mɑrɑ, wunɛ sɔɔrɑ nɛn nɑɑnɛ yɑ wɑ̃ɑ. Wunɑ ɑ mɑɑ mɑn yɑrɑ nɛn mɛron nukurun di. Wunɑ ko nɑ n siɑrɑmɔ bɑɑdommɑ.

⁷ Tɔn dɑbiru tɑ̀ n mɑn wɑ, biti rɑ bu mwɛwɑ. Adɑmɑ wunɛ, ɑ kuɑ nɛn kuku yee dɑmɡiru.

⁸ Yinni Gusunɔ, ɑ de nɑ n nun siɑrɑmɔ bɑɑdommɑ. A de nɑ n nun bɛɛrɛ wɛ̃ɛmɔ tɔ̃ɔ bɑɑtere.

⁹ A ku mɑn deri nɛn tɔkɔru sɔɔ. A de ɑ n kɑ mɑn wɑ̃ɑ bɑɑ nɑ̀ n dɑm dwiiyɑ.

¹⁰ Domi nɛn yibɛrɛbɑ bɑ nɛn ɡɑri mɔ̀. Be bɑ kɑsu bu mɑn ɡo, bɑ nɔɔ tiɑ mɔ̀.

¹¹ Bɑ ɡerumɔ bɑ mɔ̀, wee ɑ mɑn deri. Bɑ koo mɑn nɑɑ swĩiwɑ bu mwɑ. Domi nɑ ǹ ɡoo mɔ u mɑn wɔrɑ.

¹² Ǹ n mɛn nɑ, Gusunɔ nɛn Yinni, ɑ ku mɑn deri. A nɑ fuuku ɑ mɑn somi.

¹³ A de be bɑ kɑsu bu mɑn ɡo mi, bu burisinɑ bu kɑm ko. A de be bɑ nɛn kɑm kobu kĩ bu sekuru wɑ.

¹⁴ Adɑmɑ nɛ, wunɑ nɑ yĩiyɔ. Nɑ kon nun siɑrɑmɔwɑ nɑ n dɔɔ.

¹⁵ Kpɑ n wunɛn ɡem kɑ wunɛn fɑɑbɑn ɡɑri kpɑrɑ tɔ̃ɔ bɑɑtere. Domi yɑ ǹ nɔru mɔ.

¹⁶ Yinni Gusunɔ, kon wunɛn sɔm dɑmɡinun ɡɑri ɡere. Wunɛ turon ɡem ɡɑriyɑ kon kpɑrɑ.

¹⁷ Gusunɔ, wunɑ ɑ mɑn keu koosiɑ sɑɑ nɛn birun di. Yen sɔ̃nɑ sere kɑ tɛ̃ nɑ wunɛn sɔm ɡeenun ɡɑri kpɑrɑmɔ.

¹⁸ Gusunɔ, ɑ ku mɑn deri bɑɑ nɑ̀ n tɔkɔ kuɑ, kpɑ n kpĩ n kɑ tɛ̃n ɑluwɑɑsibɑ kɑ be bɑ koo rɑ mɑrurɑ wunɛn dɑm ɡɑri sɔ̃.

¹⁹ Wunɛn ɡem mu wɑ̃ɑwɑ sere kɑ wɔllɔ. Gusunɔ, ɡɑ̃ɑ bɑkɑnɑ ɑ kuɑ. Wɑrɑ u kɑ nun weenɛ.

²⁰ Wunɑ ɑ derɑ sɑ wɑhɑlɑ kɑ nuku sɑnkirɑnu wɑ. Adɑmɑ kɑɑ nɑ ɑ sun wɑ̃ɑru wɛ̃, kpɑ ɑ sun yɑrɑ sɑɑ siki wɔrun di.

²¹ A mɑn nukuru yɛmiɑsio kpɑ ɑ de n nun bɛɛrɛ wɛ̃.

²² Yinni, kon nun tɔmɑ kɑ mɔrɔku, kpɑ n nun siɑrɑ kɑ womusu wunɛn bɔrɔkinirun sɔ̃. Kon wunɛn yĩsiru wɔlle suɑ kɑ mɔrɔku, wunɛ wi ɑ sɑ̃ɑ Isirelibɑn Yinni Dɛɛro.

²³ Nɑ̀ n nun siɑrɑmɔ, bɑ koo nɛn nuku dobu wɑ nɛn wuswɑɑn di. Mɛyɑ mɑɑ nɛn hunde ye ɑ wɔrɑ yɑ koo nun tɑkɑru ko.

²⁴ Mɛyɑ mɑɑ nɛn yɑrɑ yɑ ko n wunɛn ɡɑri kpɑrɑmɔ sɑɑ bɑɑyere. Be bɑ kɑsu bu mɑn ɡo, bɑ burisinɑ bɑ sekuru wɑ.