Womusu 7 - Bibeli Gusunɔn Gari

¹ Womu ɡe Dɑfidi u kuɑ sɑnɑm mɛ u nuki sɑnkire Kusi Bɛnyɑmɛɛɡiin sɔ̃. Ge wee.

² Gusunɔ nɛn Yinni, wunɑ nɑ nɑɑnɛ sɑ̃ɑ. A mɑn wɔro be bɑ mɑn nɑɑ ɡiren nɔmɑn di.

³ Kpɑ bu ku rɑɑ mɑn mwɑ bu kɑsuku nɡe mɛ ɡbee sunɔ ɡɑ rɑ yɑɑ kɑsuku, ɡoo u kun ye wɔre.

^4-5 Gusunɔ, nɛn Yinni, wee bɑ mɑn tɑɑrɛ wɛ̃ɛmɔ bɑ mɔ̀, nɑ ɡoo torɑri, nɑ nɛn kĩnɑsi bɔrɔ kɔ̃ɔru kuɑ, nɑ nɛn yibɛrɛ wɔri, nɑ win yɑ̃nu wɔrɑ kɑ wɔbiɑ. Adɑmɑ nɑ̀ n yen ɡɑɑ kuɑn nɑ kɑ ɡem,

⁶ ɑ de nɛn yibɛrɛ u mɑn sɛ̃re u ɡo. A de u nɛn ɡoru deri mi.

⁷ Yinni Gusunɔ, ɑ nɛn yibɛrɛ wɔrio kɑ mɔru. Be bɑ kɔ̃ruɑ, ɑ bu sɛɛyɑsio kɑ mɔru. A de ɑ n wɑ̃ɑ nɛn bɔkuɔ. A de ɑ mɑn siriɑ.

⁸ Yinni Gusunɔ, wee ɑ sɔ̃ wunɛn sinɑ ɡɔnɑɔ. A de bwesenu nu mɛnnɑmɑ mi. A de ɑ nu siri mi.

⁹ Yinni Gusunɔ, wunɑ kɑɑ tɔmbu siri. A mɑn sirio nɡe mɛ nɛn dɛɛrɑrɑ nɛ. A mɑn nɛn ɡem wɛ̃ɛyɔ.

¹⁰ A de tɔn kɔ̃sobun dɑɑ yu nɔru ko, kpɑ ɑ de ɡemɡibu bu kuurɑ. Yinni Gusunɔ, ɑ sɑ̃ɑwɑ ɡemɡii. Wunɑ ɑ rɑ tɔnun ɡɔ̃run ɡɑri wɛ̃ɛri.

¹¹ Wunɑ ɑ rɑ mɑn ɡɑnɛ nɡe tɛrɛru. Wunɑ ɑ rɑ bèn ɡɔ̃ru ɡɑ dɛɛre fɑɑbɑ ko.

¹² Wunɛ, ɑ rɑ siriwɑ dee dee. Yinni Gusunɔ, ɑ mɑɑ sɛ̃.

¹³ Kɑ mɛ, tɔn kɔ̃so u ku rɑ win dɑɑ deri. U rɑ win tɑkobi nɔɔ dɛrewɑ. U rɑ win tɛndu bɛriwɑ. U win sɛ̃u sɔre u yĩisi.

¹⁴ U tɑbu yɑ̃ɑ ɡɔɔɡinu kuɑ. Mɑ u sɛ̃ɛ dɔ̃ɔɡinu kuɑ.

¹⁵ U win sɔmburu seewɑ. U kɔ̃sɑ bwisikumɔ. U weesu wĩimɔ.

¹⁶ U suurɑ ɡbɑ ɡɑbun sɔ̃, ɑdɑmɑ win tiiwɑ u koo ye wɔri.

¹⁷ Kɔ̃sɑ ye u rɑɑ kuɑ kpuro, win wirɔwɑ yɑ koo wɔri. Win dɑmɡii te u rɑɑ dɔrɑmɔ, win wirɑ tɑ koo kɔrɑ.

¹⁸ Yinni Gusunɔ, kon nun siɑrɑ, domi ɑ sɑ̃ɑ nɑɑnɛɡii. Yinni Wɔrukoo, kon nun tɔmɑ kɑ womu.