Womusu 64 - Bibeli Gusunɔn Gari

¹ Womu ɡe Dɑfidi u wom kowobun wiruɡii kuɑ. Ge wee.

² Gusunɔ, ɑ nɛn nɔɔ nɔɔwɔ sɑnɑm mɛ nɑ weeweenu mɔ̀. A mɑn kɔ̃suo nɛn yibɛrɛ wi nɑ nɑsien sɔ̃.

³ A mɑn yɑro tɔn kɔ̃sobun wesiɑnɔsun di. Kpɑ ɑ mɑn yɑrɑ dɑɑ kɔ̃sɑɡibun suunun di.

⁴ Bɑ ben yɑrɑ nɔɔ derɑmɔ nɡe tɑkobi, kpɑ bɑ n ɡɑri kɔ̃si kɑsukumɔ nɡe sɛ̃ɛnu,

⁵ bu kɑ wi u kun ɡɑ̃ɑnu kue to ɑsiri sɔɔ.

⁶ Bɑ tii dɑm kɛ̃mɔwɑ kɔ̃sɑn kobu sɔɔ. Bɑ rɑ nɔɔ tiɑ ko bu kɑ tɔmbu yinɑ bɛriɑ bɑ n mɔ̀, ɡoo kun bu wɑsi.

⁷ Kɔ̃sɑ bɑ himbɑ mɔ̀ bɑ mɔ̀, ben kpunɑɑ ye, yɑ wɑ̃wɑ mɑm mɑm. Domi ɡoo kun kpɛ̃ u tɔnun ɡɔ̃run ɡɑri tubu.

⁸ Gusunɔ u bu sɛ̃ɛnu twee. Wee nu bu ɡirɑri.

⁹ U bu mwɑ kɑ ben tii tiin ɡɑri. Be bɑ bu wɑ kpuro bɑ rɑ wii ɡimɑnu kowɑ.

¹⁰ Kpɑ bɛrum mu be kpuro mwɑ bɑ n kpɑrɑmɔ ye Gusunɔ u kuɑ, kpɑ bɑ n yen bwisikunu mɔ̀.

¹¹ Yinni Gusunɔn miyɑ ɡemɡii u rɑ kuku yeru kɑ nuku dobu wɑ. Kpɑ bèn ɡɔ̃ru ɡɑ dɛɛre bu bɛɛrɛ wɑ win mi.