Womusu 61 - Bibeli Gusunɔn Gari

¹ Dɑfidin womu ɡe u wom kowobun wiruɡii kuɑ kɑ mɔrɔku. U nɛɛ,

² Gusunɔ, ɑ nɛn weeweenu nɔɔwɔ, kpɑ ɑ nɛn kɑnɑru nɔ.

³ Sɑɑ tontonden diyɑ nɑ nun nɔɔɡiru sue kɑ nuku sɑnkirɑnu. A kɑ mɑn ɡuuru yɔɔwo te nɑ ǹ kpɛ̃ n kɑ tii yɔ.

⁴ Domi ɑ sɑ̃ɑwɑ nɛn kuku yeru. Mɑ ɑ mɑɑ sɑ̃ɑ nɛn ɡbɑ̃rɑru nɛn yibɛrɛbɑn wuswɑɑɔ.

⁵ Nɑ kĩ nɑ n wɑ̃ɑ wunɛn kuu bekuruɡirɔ sere kɑ bɑɑdommɑɔ, nɑ n kukuɑ wunɛn kɑserun kɔkɔrɔ.

⁶ Domi ɑ rɑ mɑn kue ye nɑ kĩ, kpɑ ɑ mɑn tubi wɛ̃ ye ɑ rɑ be bɑ wunɛn yĩsiru nɑsie wɛ̃.

⁷ Gusunɔ, ɑ bɛsɛn sinɑ bokon wɑ̃ɑru dɑkɑɑ dɑɑsio. A de win wɑ̃ɑru tu dɛnyɑ.

⁸ Kpɑ ɑ de u n bɑndu dii sere kɑ bɑɑdommɑɔ wunɛn wuswɑɑɔ. A de wunɛn bɔrɔkiniru kɑ wunɛn tɔn ɡeerɑ n wɑ̃ɑ wi sɔɔ.

⁹ Sɑɑ yerɑ kon nun tɔmɑ sere kɑ bɑɑdommɑɔ, kpɑ nɑ n nɛn nɔɔ mwɛɛru yibiɑmɔ tɔ̃ɔ bɑɑtere.