Womusu 41 - Bibeli Gusunɔn Gari

¹ Womu ɡe Dɑfidi u wom kowobun wiruɡii kuɑ. U nɛɛ,

² doo nɔɔruɡiiwɑ wi u rɑ sɑ̃ɑron bwisikunu ko. Ù n wɑ̃ɑ wɑhɑlɑ sɔɔ, Yinni Gusunɔ u koo nùn yɑrɑ.

³ Yinni Gusunɔ u koo nùn kɔ̃su, kpɑ u n win wɑ̃ɑru nɛni. Mɛyɑ u ko n nuku dobu mɔ win wɑ̃ɑru sɔɔ. U ǹ mɑɑ derimɔ u wɔri win yibɛrɛbɑn nɔmɑɔ.

⁴ Yinni Gusunɔwɑ u koo nùn kɔ̃su kpɑ u nùn nɔɔri sɑnɑm mɛ u bɑrɔ u kpĩ.

⁵ Wee, nɑ ɡerumɔ nɑ mɔ̀, Yinni Gusunɔ, ɑ nɛn wɔnwɔndu wɑɑwo, ɑ nɛn hunde bɛkio. Domi nɑ nun torɑri.

⁶ Nuku kɔ̃surun sɔ̃, nɛn yibɛrɛbɑ bɑ mɔ̀, sɑɑ yerɑ̀ kon ɡbi. Kpɑ bu wɑ bu nɛn yĩsiru duɑri.

⁷ Goo ù n nɑ nɛn mi, weesɑ yɛ̃ro u rɑ mɑn kue, kpɑ u nɛn ɡɑri ɡurɑ u kɑ dɑ u nɛn kɔ̃sɑ ɡere tɔɔwɔ.

⁸ Nɛn yibɛrɛbɑ kpuro bɑ ɡunnu ɡunnu ɡɑri mɔ̀. Bɑ mɑn kɔ̃sɑ bwisikusimɔ.

⁹ Domi bɑ mɔ̀, wɑhɑlɑ ye, yɑ mɑn nɛni ɡem kɑ tiɑ. Nɛ wee nɑ kpĩ, n ǹ koorɔ n mɑɑ se.

¹⁰ Nɛn bɔrɔ kĩnɑsi, kɑ wì sɑ wɑ̃ɑ sɑnnu bɔri yɛndu sɔɔ, nɑ mɑɑ nùn nɑɑnɛ sɑ̃ɑ, mɑ sɑ dimɔ sɑnnu, wiyɑ u kuɑ nɛn yibɛrɛ.

¹¹ Yen sɔ̃, Yinni Gusunɔ, ɑ nɛn wɔnwɔndu wɑɑwo, ɑ mɑn wɔro, kpɑ n bu kuɑ ye n weenɛ n bu kuɑ.

¹² Nɛn yibɛrɛ ù kun mɑn kɑmiɛ, sɑɑ ye sɔɔrɑ kon ɡiɑ mɑ ɑ mɑn kĩ.

¹³ A mɑn kɔ̃su nɛn mɛm nɔɔbun sɔ̃. Mɑ ɑ derɑ nɑ wɑ̃ɑ wunɛn mi sere kɑ bɑɑdommɑɔ.

¹⁴ Nɑ Gusunɔ Isirelibɑn Yinni siɑrɑ. U ko n wɑ̃ɑwɑ sere kɑ bɑɑdommɑɔ. Ami.