Womusu 40 - Bibeli Gusunɔn Gari

¹ Dɑfidin womu ɡe u wom kowobun wiruɡii kuɑ. U nɛɛ,

² nɑ nɛn yĩiyɔbu doke Yinni Gusunɔn mi. Mɑ u mɑn sĩiremɑ u nɛn nɔɔ swɑɑ dɑki.

³ U mɑn ɡɑwɑ u yɑrɑ sɑɑ kɑm kobun wɔrun di, mi pɔtɔkɔ wɑ̃ɑ. U nɛn nɑɑsu sɔndi kpee sɑɑrɑ wɔllɔ, kpɑ n kɑ yɔ̃rɑ dim dim.

⁴ Gusunɔ u derɑ nɑ womu kpɔɔ mɔ̀ ɡe nɑ kɑ nùn siɑrɑmɔ. Tɔn dɑbiru tɑ nuɑ mɑ tɑ bɛrum kuɑ, mɑ tɑ ten nɑɑnɛ doke Yinni Gusunɔ sɔɔ.

⁵ Doo nɔɔruɡiiwɑ wi u Yinni Gusunɔ nɑɑnɛ sɑ̃ɑ, wi u ku rɑ ɡɛre u tii suobu kɑ wee kowobu swĩi.

⁶ Gusunɔ nɛn Yinni, wunɛn sɔm ɡeenu kɑ wunɛn himbɑ ye ɑ sun kuɑ yɑ dɑbi. Gusunɔ, ɑ kpɑ̃, ɑ ǹ sɑɑrɑ mɔ. Nɑ kĩ n ye kpuro kpɑrɑ n tɔmbu nɔɔsiɑ. Adɑmɑ yen ɡeerɑ kpɑ̃ sere nɑ ǹ kpɛ̃ n ye sɑɑri.

⁷ A ǹ yɑ̃kuru kĩ, ǹ kun mɛ kɛ̃ru. A ǹ yɑ̃ku dɔ̃ɔ mwɑɑrɑruɡiru bikie, ǹ kun mɛ torɑruɡiru. Adɑmɑ ɑ nɛn swɑsu kɔriɑ.

⁸ Mɑ nɑ nɛɛ, nɛ wee, nɡe mɛ bɑ nɛn ɡɑri yoruɑ woodɑn tireru sɔɔ.

⁹ Gusunɔ nɛn Yinni, nɑ kĩ n wunɛn kĩru ko. Wunɛn woodɑ yɑ wɑ̃ɑ nɛn ɡɔ̃ruɔ.

¹⁰ Tɔn wɔrun suunu sɔɔ, nɑ rɑ wunɛn fɑɑbɑn lɑbɑɑri ɡeɑ kpɑre. Yinni Gusunɔ, ɑ yɛ̃ mɑ nɑ ku rɑ nɛn nɔɔ mɑri.

¹¹ Nɑ ǹ wunɛn fɑɑbɑn ɡɑri beruɑ nɛn ɡɔ̃ruɔ. Nɑ wunɛn nɑɑnɛ kɑ wunɛn somiru tɔmbu nɔɔsiɑ. Nɑ tɔn wɔru ɡunɑ wunɛn tɔn ɡeeru kɑ wunɛn bɔrɔkiniru sɔ̃ɔsi.

¹² Yinni Gusunɔ, ɑ ku de n wunɛn wɔnwɔndu biɑ. A de wunɛn tɔn ɡeeru kɑ wunɛn bɔrɔkiniru tu mɑn kɔ̃su sɑɑ kpuro sɔɔ.

¹³ Domi kɔ̃sɑ ye yɑ mɑn sikerenɛ yɑ ǹ ɡɑrirɔ. Nɛn kom kɔ̃sum kpuro mɑn ɡirɑri, mu ǹ wɑɑbu wɑ̃. Mu nɛn wirun seri dɑbiru kere. Nɑ mwiɑ kpɑnɑ.

¹⁴ Yinni Gusunɔ, ɑ mɑn wɔro, ɑ nɑ fuuku ɑ mɑn fɑɑbɑ ko.

¹⁵ A de be bɑ kɑsu bu mɑn hunde wunɑ bu seku bɑkɑru wɑ. A de be bɑ nuku dobu mɔ nɛn wɑhɑlɑn sɔ̃ bu biru wurɑ kpɑ bu sekuru di.

¹⁶ A de be bɑ mɑn yɑɑkoru mɔ̀ bɑ n wɑ̃ɑ dɛsirun biti sɔɔ.

¹⁷ Adɑmɑ ɑ de be bɑ nun kɑsu bɑ n nuku dobu mɔ. Kpɑ be bɑ wunɛn fɑɑbɑ wurɑ bɑ n yɛ̃ɛrimɔ wunɛn sɔ̃. Kpɑ bɑ n ɡerumɔ mɑ Yinni Gusunɔwɑ kpɑ̃ɑru bo.

¹⁸ Adɑmɑ nɛ sɑ̃ɑrowɑ, nɑ ǹ ɡɑ̃ɑnu mɔ. Kɑ mɛ, Yinni u mɑn yɑɑye. Nɛn Yinni, wunɛ wi ɑ rɑ mɑn somi kpɑ ɑ mɑn wɔrɑ, ɑ ku tɛ.