Womusu 36 - Bibeli Gusunɔn Gari

¹ Womu ɡe Dɑfidi Gusunɔn sɔm kowo u wom kowobun wiruɡii kuɑ. U nɛɛ,

² tɔn kɔ̃so wi u ǹ kɑ Gusunɔ yɔ̃n ɡɑri mɑn sɔkumɔ nɛn ɡɔ̃ruɔ, domi u ǹ bwisikumɔ mɑ n weenɛ u Gusunɔ nɑsiɑ.

³ U win tii sue too. Yen sɔ̃nɑ u ǹ win torɑru wurɑmɔ, kpɑ u tu tusi.

⁴ Win ɡɑri kpuro, weesɑ yi sɑ̃ɑ. U ku rɑ wure u ɡɑ̃ɑnu ko kɑ lɑɑkɑri u sere ɡeɑ ko.

⁵ Kɔ̃sɑ u rɑ n bwisikumɔ win kpin yerɔ. Yen swɑɑ sɔɔrɑ u rɑ n mɑɑ wɑ̃ɑ. U ku rɑ ye dukɑ suuri.

⁶ Adɑmɑ Yinni Gusunɔ, wunɛn durom mu wɑ̃ɑwɑ sere kɑ wɔllɔ. Wunɛn bɔrɔkiniru tɑ mɑɑ sɔ̃ɔsire sere kɑ ɡuru winɔ.

⁷ Mɛyɑ mɑɑ wunɛn ɡem mu kpɑ̃ nɡe ɡuu bɑkɑnu. Wunɛn siribu bu duku nɡe nim wɔ̃kun bweru. Yinni Gusunɔ, wunɑ ɑ rɑ tɔmbu kɑ yɛɛ nɔɔri,

⁸ domi wunɛn kĩru tɑ kpɑ̃. Wunɛn kɑsenun kɔkɔrɔwɑ tɔmbɑ kuku yenu kɑsu.

⁹ A rɑ wunɛn durom yibie nɡe be bɑ di bɑ debɑ. A rɑ bu nuku dobu wɛ̃ nɡe be bɑ nim ɡem wɑ bɑ nɔrɑ.

¹⁰ Domi wunɑ ɑ sɑ̃ɑ wɑ̃ɑrun nuuru. Wunɛn yɑm bururɑm sɑɑbuwɑ sɑ kɑ wɑ̃ɑrun ɑsɑnsi tubumɔ.

¹¹ A be bɑ nun yɛ̃ durom kuo. A bèn ɡɔ̃ru ɡɑ dɛɛre bɔrɔkiniru sɔ̃ɔsio.

¹² A ku de tii suobu bu mɑn nɑɑ turi, kpɑ tɔn kɔ̃sobu bu de n dukɑ yɑkurɑ.

¹³ Wee be bɑ kɔ̃sɑ mɔ̀, bɑ wɔrukumɔ, mɑ bɑ kpɑnɛ bu se.