Womusu 33 - Bibeli Gusunɔn Gari

¹ Bɛɛ be i sɑ̃ɑ ɡemɡibu, i Gusunɔ siɑro kɑ womusu. Bɛɛ be i dɛɛre, i nùn siɑro bɑɑdommɑ.

² I nùn siɑro kɑ mɔrɔkunu kpɑ i womusu ko kɑ ɡɔ̃ɔɡenu.

³ I nùn bɛɛrɛ wɛ̃ɛyɔ kɑ wom kpɔɔ, kpɑ i ɡɑ̃ɑsu torɑ i kɑ nùn siɑrɑ.

⁴ Yinni Gusunɔ u rɑ ɡem ɡerewɑ. Ye u mɑɑ ɡeruɑ kpuro yɑ rɑ koorewɑ mɑm mɑm.

⁵ U rɑ ye yɑ woodɑ kɑ ɡem swĩi kɑ̃. Win durom mu yibɑ tem kpuro sɔɔ.

⁶ Win nɔɔn ɡɑriyɑ wɔllɑ kɑ tɑkɑ koorɑ, kɑ ɡɑ̃ɑ ni nu wɑ̃ɑ te sɔɔ kpuro.

⁷ Mɑ u derɑ nim wɔ̃kun nim mu mɛnnɑ yɑ̃ɑtem.

⁸ Bɛɛ hɑnduniɑɡibu, i Yinni Gusunɔ nɑsio. I diirio win wuswɑɑɔ.

⁹ Domi ye u ɡeruɑ kpuro, yerɑ yɑ rɑ koore. Ù n woodɑ wɛ̃ kpɑ yu koorɑ.

¹⁰ Yinni Gusunɔ u rɑ bwesenun himbɑ ɡɔsie, kpɑ yu kɑm ko mɑm mɑm.

¹¹ Adɑmɑ win himbɑ yɑ ku rɑ ɡɔsiɑre, yɑ ko n wɑ̃ɑwɑ sere kɑ bɑɑdommɑɔ.

¹² Bwese te tɑ Gusunɔ mɔ Yinni, tɑ ko n nuku dobu mɔwɑ. Mɛyɑ bwese te u mɑɑ ɡɔsɑ win tiin sɔ̃ tɑ koo yɛ̃ɛriwɑ.

¹³ Sɑɑ wɔllun diyɑ Yinni Gusunɔ u tɔmbu kpuro mɛɛrɑ.

¹⁴ Sɑɑ win wɑ̃ɑ yerun di, u hɑnduniɑɡibu kpuro mɛɛrɑ.

¹⁵ Wi, wi u tɔmbu kpuro bwisikunu wɛ̃, u mɑɑ ben kookoosu kpuron lɑɑkɑri mɔ.

¹⁶ Sinɑ boko ù n nɑsɑrɑ wɑ tɑbu sɔɔ, n ǹ mɔ yèn sɔ̃ u tɑbu kowo dɑbiru mɔ. N ǹ mɑɑ tɑbu durɔn dɑm mu rɑ nùn yɑre win yibɛrɛn nɔmɑn di.

¹⁷ Wi u win nɑɑnɛ doke dumɑ sɔɔ, u ǹ nɑsɑrɑ wɑsi. Mɛyɑ kɑ yen dɑm kpuro yɑ ǹ kpɛ̃ yu nùn wɔrɑ kɑrin di.

¹⁸ Adɑmɑ be bɑ Yinni Gusunɔ nɑsie, mɑ bɑ ben yĩiyɔbu doke win durom sɔɔ, beyɑ u kɔ̃su,

¹⁹ u kɑ ben hunde wɔrɑ ɡɔɔn di, kpɑ bɑ n wɑsi bɑɑ ɡɔ̃ɔru tɑ̀ n duɑ ben tem sɔɔ.

²⁰ Bɛsɛ, Yinni Gusunɔn miyɑ bɛsɛn yĩiyɔbu wɑ̃ɑ. Wiyɑ u koo sun somi kpɑ u sun kɔ̃su nɡe tɛrɛru.

²¹ Bɛsɛn ɡɔ̃ru ɡɑ do win sɔ̃. Sɑ mɑɑ nùn nɑɑnɛ sɑ̃ɑ win dɛɛrɑrun sɔ̃.

²² Yinni Gusunɔ, ɑ de wunɛn durom mu n wɑ̃ɑ kɑ bɛsɛ. Domi wunɛ sɔɔrɑ bɛsɛn yĩiyɔbu wɑ̃ɑ.