Womusu 28 - Bibeli Gusunɔn Gari

¹ Dɑfidin womu. Yinni Gusunɔ, wunɑ nɑ wuri koosimɔ. Wunɛ wi ɑ sɑ̃ɑ nɡe nɛn kpee bɑɑ mi nɑ rɑ kuke, ɑ ku mɑn duɑri. Domi ɑ̀ n mɑɑri mɛsum, ko nɑ n sɑ̃ɑwɑ nɡe wi u ɡɔɔ dɔɔ.

² Nɑ̀ n nɔmɑ yiiyɑ nɑ kɑnɑru mɔ̀ sɑ̃ɑ yee dɛɛrɑ ten mi, ɑ nɛn kɑnɑru swɑɑ dɑkio.

³ A ku mɑn ɡɑrisi tiɑ kɑ tɔn kɔ̃sobu, kɑ be bɑ mɑɑ kɑ ben winsim ɡɑri mɔ̀ nɡe kĩru, ɑdɑmɑ ben ɡɔ̃ruɔ kɔ̃sɑ yɑ yibɑ.

⁴ A bu ben kookoosun ɑre wɛ̃ɛyɔ nɡe mɛ yi nɛ. Ye bɑ ɡɑbu kuɑ, ɑ de yu wɔri ben wirɔ.

⁵ Domi bɑ ǹ ɡɑrɑ ye wunɛ Gusunɔ ɑ mɔ̀. Yen sɔ̃, ɑ bu kɔsukuo kpɑ bu ku rɑɑ mɑɑ se.

⁶ Yinni Gusunɔ, wunɑ kon siɑrɑ, domi ɑ rɑ nɛn kɑnɑru nɔ.

⁷ Wunɑ ɑ mɑn ɡɑnuɑ nɡe tɛrɛru, ɑ sɑ̃ɑwɑ nɛn dɑm. Wunɛ sɔɔrɑ nɛn nɑɑnɛ wɑ̃ɑ, domi ɑ mɑn fɑɑbɑ kuɑ. Mɑ nɑ nuku dobu mɔ, nɑ nun siɑrɑmɔ kɑ womusu.

⁸ Yinni Gusunɔ, ɑ sɑ̃ɑwɑ wunɛn tɔmbun dɑm. Domi ɑ sɑ̃ɑwɑ nɡe kɑ̀rì, ɑ kɑ wi ɑ ɡɔsɑ fɑɑbɑ ko.

⁹ A wunɛn tɔmbu fɑɑbɑ koowo kpɑ ɑ bu domɑru kuɑ, be, be bɑ sɑ̃ɑ wunɛn ɑrumɑni. A bu kpɑro kpɑ ɑ bu nɔɔri sere kɑ bɑɑdommɑɔ.