Womusu 26 - Bibeli Gusunɔn Gari

¹ Dɑfidin womu. Yinni Gusunɔ, wunɑ nɑ nɑɑnɛ sɑ̃ɑ mɑm mɑm. Nɑ sĩimɔwɑ dee dee wunɛn woodɑbɑ sɔɔ. A mɑn ɡem wɛ̃ɛyɔ.

² A nɛn bwisikunu kɑ nɛn bwɛ̃rɑ sirio. A mɑn wɛ̃ɛrio kpɑ ɑ mɑn ɡiɑ.

³ Domi wunɛn kĩrɑ nɑ nɔni ɡirɑri. Mɑ nɑ sĩimɔ wunɛn durom sɔɔ.

⁴ Yen sɔ̃nɑ nɑ ku rɑ kɑ tɔn kɔ̃sobu sinɛ. Mɛyɑ nɑ ku rɑ mɑɑ kɑ murɑfitibɑ sĩ.

⁵ Nɑ kɔ̃sɑn kowobu tusɑ. Nɑ ku rɑ kɑ bu sinɛ.

⁶ Nɑ rɑ nɛn nɔmɑ niɛwɑ n kɑ sɔ̃ɔsi mɑ nɑ ǹ tɑɑrɛ mɔ. Nɑ rɑ de n nun sɑ̃ nɑ n wunɛn yɑ̃ku yeru sikerenɑmɔ,

⁷ nɑ n nun siɑrɑmɔ, nɑ n wunɛn sɔm mɑɑmɑɑkiɡinun ɡɑri kpɑrɑmɔ.

⁸ Nɑ rɑ kɑ̃ n dɑ wunɛn sɑ̃ɑ yerɔ domi miyɑ ɑ rɑ n wɑ̃ɑ wunɛn yiikon ɡirimɑ sɔɔ.

⁹ Yinni Gusunɔ, ɑ ku de n ɡbi kɑ durumɡibu sɑnnu. A ku de n kɑm ko kɑ be bɑ tɔmbun yɛm yɑrimɔ sɑnnu.

¹⁰ A ku mɑn siri kɑ be bɑ dɑɑ kɔ̃sɑ mɔ̀ sɑnnu. A ku mɑn siri kɑ be bɑ rɑ nɔm birɑn kɛ̃nu mwɛ sɑnnu.

¹¹ Nɑ sĩimɔwɑ dee dee wunɛn woodɑbɑ sɔɔ. Yinni Gusunɔ, ɑ mɑn durom kuo, ɑ mɑn fɑɑbɑ koowo.

¹² Nɑ yɔ̃wɑ dim dim swɑɑ ɡeɑ sɔɔ. Yen sɔ̃nɑ kon nun siɑrɑ mi wunɛn tɔmbɑ mɛnnɛ.