Womusu 148 - Bibeli Gusunɔn Gari

¹ I Yinni Gusunɔ siɑro. I Yinni Gusunɔ siɑro sɑɑ wɔllun di. I nùn siɑro sɑɑ wɔllun sɔɔ sɔɔn di.

² Bɛɛ win ɡɔrɑdobɑ kpuro, i nùn siɑro. Bɛɛ win tɑbu kowobu kpuro, i nùn siɑro.

³ Sɔ̃ɔ kɑ suru, i nùn siɑro. Bɛɛ kperi kpuro, bɛɛ be i bɑllimɔ, i nùn siɑro.

⁴ Bɛɛ be i wɑ̃ɑ wɔllun sɔɔ sɔɔwɔ, i nùn siɑro. Bɛɛ nim mɛ mu wɑ̃ɑ wɔllɔ, i nùn siɑro.

⁵ U woodɑ wɛ̃, ye kpuro yɑ koorɑ. Ye kpuro yu nùn siɑro.

⁶ U ye tɑ̃sisiɑ sere kɑ bɑɑdommɑɔ. U koo woodɑ yi, win tii kun mɑɑ ye sɑrɑmɔ.

⁷ Sɑɑ tem sɔɔn di, i Yinni Gusunɔ siɑro. Bɛɛ nim wɔ̃ku kɑ nim bwee bɑkɑnu kɑ yɛɛ nɑnumɡii yi yi wɑ̃ɑ sɔɔ, i Yinni Gusunɔ siɑro.

⁸ Dɔ̃ɔ kɑ ɡuru kpenu kɑ ɡuri bɑkɑ kɑ bukɔ kɑ woo bɔkɔ, bɛɛ be i win woodɑbɑ mɛm nɔɔwɑmmɛ, i Yinni Gusunɔ siɑro.

⁹ Bɛɛ ɡuunu kɑ ɡunɡunu kɑ dɑ̃ɑ ye yɑ rɑ mɑ kɑ sɛdurubɑ, i Yinni Gusunɔ siɑro.

¹⁰ Gbeeku yɛɛ kɑ yɑɑ sɑbenu kpuro kɑ yɛɛ yi yi kɑbirimɔ kɑ ɡunɔsu, i Yinni Gusunɔ siɑro.

¹¹ Hɑnduniɑn sinɑmbu kɑ bwesenu kpuro kɑ sinɑ bibu kɑ hɑnduniɑn siri kowobu kpuro, i Yinni Gusunɔ siɑro.

¹² Aluwɑɑsibɑ kɑ wɔndiɑbɑ, tɔkɔnu kɑ bibu,

¹³ bɛɛ kpuro, i Yinni Gusunɔn yĩsiru bɛɛrɛ wɛ̃ɛyɔ. Win yĩsirɑ kpɑ̃. Win ɡirimɑ yɑ wɔllu kɑ tem sɑre.

¹⁴ U win tɔmbu Isirelibɑ be, be bɑ nun nɑɑnɛ sɑ̃ɑ bɑ wɑ̃ɑ win bɔkuɔ dɑm wesiɑ mɑ n kuɑ bɛɛrɛ bɑkɑ. Yen sɔ̃, i Yinni Gusunɔ siɑro.