Womusu 146 - Bibeli Gusunɔn Gari

¹ I Yinni Gusunɔ siɑro. Nɛn bwɛ̃rɑ, ɑ Yinni Gusunɔ siɑro.

² Kon wunɛ Yinni Gusunɔ siɑrɑ nɛn wɑ̃ɑrun tɔ̃nu kpuro sɔɔ. Kon wunɛ Gusunɔ nɛn Yinni womu kuɑ nɛn wɑ̃ɑrun tɔ̃nu kpuro sɔɔ.

³ I ku bɛɛn nɑɑnɛ doke sinɑmbu sɔɔ, bɑ sɑ̃ɑwɑ tɔmbu, bɑ ǹ kpɛ̃ bu bɛɛ fɑɑbɑ ko.

⁴ Ben wɛ̃siɑru tɑ rɑ doonɛwɑ kpɑ bu wurɑ bu ko tem. Yen tɔ̃ɔ te, ben himbɑ kpuro yɑ kɑm kuɑwɑ mi.

⁵ Doo nɔɔruɡiiwɑ wìn yĩiyɔbu wɑ̃ɑ wunɛ Gusunɔ Yɑkɔbun Yinni sɔɔ. Doo nɔɔruɡiiwɑ wi u win nɑɑnɛ doke Gusunɔ win Yinni sɔɔ.

⁶ Wiyɑ u wɔllu kɑ tem kuɑ kɑ nim wɔ̃ku kɑ ye yɑ wɑ̃ɑ ye kpuro sɔɔ. U sɑ̃ɑwɑ ɡemɡii sere kɑ bɑɑdommɑɔ.

⁷ U rɑ be bɑ dɑm dɔremɔ ben ɡem wɛ̃. Kpɑ u be bɑ ɡɔ̃ɔru soore dĩɑnu wɛ̃. Yinni Gusunɔ u rɑ yobu yɑkie.

⁸ U rɑ wɔ̃kobu nɔni wukie. U rɑ be bɑ tɑɑre seeye. U rɑ ɡemɡibu kɑ̃.

⁹ U rɑ sɔbu kɔ̃su. U rɑ mɑɑ ɡɔminibu kɑ ɡobekubɑ nɔɔri. Kpɑ u tɔn kɔ̃sobun himbɑ kɑm koosiɑ.

¹⁰ Yinni Gusunɔ, u ko n bɑndu diiwɑ sere kɑ bɑɑdommɑɔ. Gusunɔ Siɔnin Yinni, u ko n wɑ̃ɑwɑ sere kɑ bɑɑdommɑɔ. Yen sɔ̃, i Yinni Gusunɔ siɑro.