Womusu 143 - Bibeli Gusunɔn Gari

¹ Womu ɡe Dɑfidi u kuɑ. Ge wee. Yinni Gusunɔ, ɑ nɛn kɑnɑru nɔɔwɔ. Kpɑ ɑ nɛn bikiɑbu swɑɑ dɑki. A mɑn wisio wunɛn bɔrɔkiniru kɑ wunɛn ɡem sɔɔ.

² A ku nɛ, wunɛn sɔm kowo siri, domi ɡoo sɑri wi u koo ɡem wɑ wunɛn mi.

³ Nɛn yibɛrɛ u mɑn nɑɑ swĩi. U nɛn wɑ̃ɑru tem tɑɑre. U derɑ nɑ wɑ̃ɑ yɑm wɔ̃kurɔ nɡe be bɑ ɡu n tɛ.

⁴ Yen sɔ̃nɑ nɛn hunde yɑ dɑm dwiiyɑ, mɑ nɑ nuki sɑnkire too.

⁵ Nɑ ɡɑsɔn wɑ̃ɑru yɑɑye. Nɑ wunɛn sɔmɑ kpuro lɑsɑbu mɔ̀, mɑ nɑ wunɛn nɔmɑn sɔmburu bwisikumɔ.

⁶ Wunɑ nɑ nɔmɑ tĩi. Nɛn ɡɔ̃ru ɡɑ wunɛn bɛkɛ bɑrɔ nɡe mɛ tem ɡbebɑ rɑ n nim kĩ.

⁷ Yinni Gusunɔ, nɑ mwiɑ kpɑnɑ. A mɑn wisio kpɑɑkɑ. A ku mɑn biru kisi kpɑ n ku ko nɡe be bɑ wɑ̃ɑ ɡɔriɔ.

⁸ A mɑn wunɛn tɔn ɡeeru sɔ̃ɔsio bururu kɑ yokɑ, wunɑ nɑ nɑɑnɛ sɑ̃ɑ. A mɑn swɑɑ sɔ̃ɔsio ye kon swĩi, wunɑ nɑ nɛn hunde nɔmu sɔndiɑ.

⁹ Yinni Gusunɔ, ɑ mɑn wɔro sɑɑ nɛn yibɛrɛbɑn nɔmɑn di, wunɛn miyɑ nɑ kuku yeru kɑsu.

¹⁰ Wunɑ sɑ̃ɑ nɛn Yinni. A mɑn sɔ̃ɔsio mɛ ko nɑ n dɑ wunɛn kĩru ko. A de wunɛn Hunde ɡeo wi, u mɑn kpɑrɑ swɑɑ ye yɑ nɔɔ nɛ sɔɔ.

¹¹ Yinni Gusunɔ, ɑ mɑn wɔro nɡe mɛ ɑ nɔɔ mwɛɛru kuɑ. A nɛn hunde wunɔ wɑhɑlɑn di wunɛn ɡem sɔ̃.

¹² A nɛn yibɛrɛbɑ kɑm koosio, kpɑ ɑ nɛn wɛrɔbu kpuro kpeerɑsiɑ yèn sɔ̃ ɑ mɑn kĩ. Nɑ sɑ̃ɑwɑ wunɛn sɔm kowo.