Womusu 141 - Bibeli Gusunɔn Gari

¹ Womu ɡe Dɑfidi u kuɑ. Ge wee. Yinni Gusunɔ, nɑ nun soku, ɑ nɑ fuuku nɛn mi. A nɛn nɔɔ swɑɑ dɑkio nɑ̀ n nun sokumɔ.

² A de nɛn kɑnɑru tu nun ɡirɑri nɡe turɑre nubu duroruɡiɑn wiisu. Kpɑ nɔmɑ ye nɑ yiiye yɑ n sɑ̃ɑ nɡe kɛ̃ru te bɑ rɑ kɑ nun nɑɑwɛ wunɛn sɑ̃ɑ yerɔ yokɑ.

³ Yinni Gusunɔ, ɑ nɛn nɔɔ bɔkuo. A nɛn nɔɔ sɑrusu kɔ̃suo.

⁴ A ku de nɛn ɡɔ̃ru ɡu dɑ kɔ̃sɑ ɡiɑ. A ku de n kom kɔ̃sum ko kɑ be bɑ ɡem sɑriru swĩi. A ku de n kɑ bu tɔ̃ɔ bɑkɑ dim di.

⁵ Gemɡii ù n mɑn so, kĩrɑ u mɑn sɔ̃ɔsi. Ù n mɑn ɡerusi, u mɑn ɡum tɑ̃rewɑ nɛn wirɔ. Nɑ ǹ ye yinɑmɔ. Adɑmɑ nɑ ǹ nɛn kɑnɑru mɑrimɔ tɔn kɔ̃sobun sɔ̃.

⁶ Gusunɔ, ɑ ben siri kowobu sureo kpenu sɔɔ, kpɑ bu nɛn ɡɑri swɑɑ dɑki, domi yi sɑ̃ɑwɑ ɡɑri dori.

⁷ Nɡe mɛ bɑ̀ n kɔrɔ mɔ̀ tem mu rɑ nɔɔ bɑɑre, nɡe mɛyɑ ɡɔribun wɑ̃ɑ yerɑ koo nɔɔ bɑɑrɑ tu ben kukunu mwɛ ni nu yɑrinɛ.

⁸ Yinni Gusunɔ, wunɑ nɑ mɛɛrɑ. Wunɛn miyɑ nɑ kukuɑ. A ku nɛn wɑ̃ɑru doke kɑri sɔɔ.

⁹ A mɑn ɡbɑro tɔn kɔ̃sobun yinɑ ye bɑ mɑn bɛrien di. A mɑn ɡbɑro ben tɑɑ ye bɑ mɑn bɛrien di.

¹⁰ A de tɔn kɔ̃so be, bu wɔri ben yinɑ sɔɔ, kpɑ nɛ, n kisirɑ min di.