Womusu 115 - Bibeli Gusunɔn Gari

¹ Yinni Gusunɔ, n ǹ bɛsɛ sɑ bɛɛrɛ mɔ, wunɑ ɑ bɛɛrɛ mɔ wunɛn tɔn ɡeeru kɑ wunɛn bɔrɔkinirun sɔ̃.

² Mbɑn sɔ̃nɑ tɔn tukobu bɑ koo nɛɛ, mɑnɑ Gusunɔ bɛsɛn Yinni u wɑ̃ɑ.

³ Gusunɔ bɛsɛn Yinni u wɑ̃ɑ wɔllɔ, u mɔ̀ ye u kĩ.

⁴ Adɑmɑ tɔn tukobɑ ben bũnun bwɑ̃ɑrokunu kuɑwɑ kɑ wurɑ kɑ sii ɡeesu. Nu sɑ̃ɑwɑ tɔmbun nɔmɑn sɔmɑ.

⁵ Bwɑ̃ɑroku ni, nu nɔsu mɔ, ɑdɑmɑ nu ku rɑ ɡɑri ɡere. Nu nɔni mɔ, ɑdɑmɑ nu ǹ yɑm wɑɑmɔ.

⁶ Nu swɑsu mɔ, ɑdɑmɑ nu ǹ ɡɑri nɔɔmɔ. Nu wɛ̃ru mɔ, ɑdɑmɑ nu ǹ numiɑmɔ.

⁷ Nu nɔmɑ mɔ, ɑdɑmɑ nu ǹ kɑ ɡɑ̃ɑnu bɑbɑmɔ. Nu nɑɑsu mɔ, ɑdɑmɑ nu ku rɑ sĩ. Nin dɔkɔrɑ kun mɑɑ nɔɔrɔ.

⁸ Be bɑ bwɑ̃ɑroku ni mɔ̀ kɑ be bɑ ben nɑɑnɛ doke ni sɔɔ, bɑ sɑ̃ɑwɑ nɡe ni.

⁹ Bɛɛ Isirelibɑ, i bɛɛn nɑɑnɛ dokeo Yinni Gusunɔ sɔɔ. U sɑ̃ɑwɑ bɛɛn fɑɑbɑ kowo kɑ bɛɛn tɛrɛru.

¹⁰ Bɛɛ yɑ̃ku kowobu Aronin bweseru, i bɛɛn nɑɑnɛ dokeo Yinni Gusunɔ sɔɔ. U sɑ̃ɑwɑ bɛɛn fɑɑbɑ kowo kɑ bɛɛn tɛrɛru.

¹¹ Bɛɛ be i Yinni Gusunɔ nɑsie, i bɛɛn nɑɑnɛ dokeo wi sɔɔ. U sɑ̃ɑwɑ bɛɛn fɑɑbɑ kowo kɑ bɛɛn tɛrɛru.

¹² Yinni Gusunɔ u sun yɑɑye. U koo sun domɑru kuɑ. U koo Isirelibɑ domɑru kuɑ. U koo Aronin bibun bweseru domɑru kuɑ.

¹³ U koo be bɑ nùn nɑsie domɑru kuɑ, bukurobu kɑ bibu.

¹⁴ U koo bɛɛ kɑ bɛɛn bibu win durom dɑbiɑsiɑ.

¹⁵ Yinni Gusunɔ u bɛɛ domɑru kuo wi, wi u wɔllu kɑ tem tɑkɑ kuɑ.

¹⁶ Wɔllu tɑ sɑ̃ɑwɑ wiɡiru, mɑ u tɔmbu tem wɛ̃.

¹⁷ N ǹ ɡɔribu bɑ rɑ Yinni Gusunɔ sɑ̃ be, be bɑ wɑ̃ɑ mi yɑm dɑ n mɑɑri sɔ̃ɔ sɔ̃ɔ.

¹⁸ Adɑmɑ bɛsɛrɑ sɑ ko nùn sɑ̃ sɑɑ tɛ̃n di sere kɑ bɑɑdommɑɔ. Yen sɔ̃, i Yinni Gusunɔ siɑro.